Dem ersamen geystlichen herrn herrn Jorgn Nagl zw Wels priester Passawer pistum enpewtt ich Lienhartt Zachrl des Zacherlein etwenn gesessen zu Hof auf dem Mitterhoff inn Gunskircher pfarr saligen sun, mein unndertanig dienst wisset zuvor mit guettem willen. Ich fueg euch zw wissn, das ich meinem liebn brueder Wolffganng Zacherl, die zeitt gesessn zw Hoff, Dorothea seiner hawsfraw und allen iern baidn erbn all mein erbliche gerechtigkaitt, so ich gehabt habe an dem Mitterhoff zw Hof mit all seiner rechtlicher zuegehorung, der dan ewr dienstpars guett ist, verkawfft und kewfflich zw kawffn gebn habe umb ain sum geltcz, dar an mich wolbenuegt hatt und mein erbn hin fur auch benuegen soll, und der ich von in zw rechter zeitt und an allen schadn ausgericht, beczalt und gewertt pin wardn, dar auf pitt ich ewr wierdigkaitt als mein liebn herrn, ir wellet im, seiner gemelten hawsfrawn und iern baidn erbn brieff und sygl dar uber unnder ewrn innsygl fertting und bestattn und wan ewr wierdigkaitt das nun also gethann hatt, so glob ich ewr wierdigkaitt pey trewn und ernn fur mich und all mein erbn in ewr wierdigkaitt brieff sygl noch ferttigung nicht mer zw redn weder wenyg noch vill in kaynnerlay weys getrewlich und ungevarlich, und sennde des ewr wierdigkait die offenn pettczettl ferferttigt und und besstatt under der erbern und weysn Taman Hofer und Taman Kappeller, baid burger zw Wels aufgedrukchten pettschafft, die ich obgemelter Lienhartt Zacherl mitt vleis darumb gepettn hab, doch in, irn erbn und pettschafft an schadn, dar unnder ich mich benanntter Lienhart fur mich und all mein erbn verpintt war und statt bey trewn und ern zw haltn inhalt der pettzettl, die gebn ist nach Crissty geburd tawsenntt vier hundertt und im drew und achczigisst jare an manntag nach sand Margrettn tag der heiligen junkchfrawn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 29f, Nr. 3030