Erwirdiger geistlicher gnadiger lieber herr, eurn gnadn sein mein gehorsam willig dinst bevor. Die edel fraw Warbara weilend hern Ortolfn Gewmans salign witib schikt eurn gnaden hiemit ain spruchbrief von weilend herrn Wolfgangn von Wallsee ausgangn, den sy dan in etbas merklichn sachen von ir sckikhen sol, und nach dem aber der benantn frawn und irn khindn ob solher brief nicht pald widerumb zu irn hanndtn khem, not ist des innhalt und maynung ze wissn gleiblich furzebringn, versiecht sy sich besonder gunst und guter nachparschaft bey eurn gnadn auch von mein wegn sonderlich gutn willn zu beweisn, darauf bitt ich eur gnad mit diemutigem vleus als meinem gnadign herrn welle der benantn frawen solhs briefs in massn eurn gnadn der furbracht wirdet vidimus geben und auf das paldist bei dism botn schikhn, wan sy den brief auf morgn von ir schikhen sol und mues, das wil die fraw in sonder guter nachtparschaft und ich diemutigklich von im wegn umb eur gnad verdienn, eur gnad welle auch zu gut nemmen das eurn gnaden nicht dy fraw schreibt, wan sy versiecht sich gantz eur gnad sey solhs willens, das sy von mein wegn des nicht vertign werde als ich des auch eurn gnadn getraw. Datum Gailspach in vigilia Jacobi apostoli anno etc. lxxxiii

Linhart Dietnshaimer||
landschreiber ob der Enns