Dem erwirdigen geistlichen herren herrn Johannsen abten zu Lambach meinen genadigen herren embeut ich Barbara, des Fridrich im Orbach in Gerstner pfarr gesessen eeliche tochter, mein gehorsam und undertanig dinst zuvor, und fug euren gnaden ze wissen, daz mich mein frunde mit wissen mein zu euer gnaden hindersassen Wolfgangen zu Hehenwart auf der undern Swaig in Kirchdorffer pfarr gesessen eelichen verheirat haben und in derselben heirat abred mit allem unserr baider varunden und anligunden guet begriffen kopf an kopf, welher tail vor dem andern an leibserben, so wir miteinander hieten, abgieng, dem lebenden tail des andern guet ze beleiben damit ze hanndln wie in verlusst. Ob aber ain tail dem andern leiberben liess, so wir miteinander hieten, denselben leibserben sol unser baider gut halbs nachvolgen, so sy zu iren vogtpern jaren komen innhalt des gemachtbriefs, so euren gnaden hiemit furbracht wirdet, bitt ich in gehorsam eur gnad und den, wen eur gnad zu zeugsidl darzue nemen wirdet, ir wellet solh unser gemacht mit euren insigln verfertigen, bestatten und bezeugen, und so solhs beschehen ist, gelob ich benante Barbara fur mich und all mein erben in eur gnaden verfertigung bestatt und zeugnuss nichts ze reden, und wil das allzeit undertaniklich umb eur gnad verdienn. Mit urkund der petzetl versorgt durch meiner benanten Barbara vleissigen bete willen mit der erbern weisen Petern Dornynger huefsmid und Jorgen Pekhen baider burger zu Steir im Ensdorf gesessen aufgedrukhten petschadten, doch in und iren erben an schaden, darunder ich mich genante Barbara und fur all mein erben verpindt innhalt des briefs und der petzetl war und stat ze hallten. Geben an freitag vor Nicolai episcopi anno domini M^occcc^olxxx^otertio

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 57f, Nr. 3057