Erwierdiger herr, mein willig dinst wisset pevar. Ich lass ewr wierdigkait wissenn, das die von Schawnberg auch die vom Starchnberg ain merklichem tag mit ein ander habn zw Lincz auf den nagstenn mantag. Nun habenn die van Starchnberg denn Newnhofer den farsprechenn auch pestelt, nun geyt der Newnhoffer den van Starchnberg antwuert, er sey pestelt van dem Sachsn zwu ainem recht fuer euch an erichtag var sand Elspetenn tag sein sol, also piten euch mein herrn van Starchnberg mit sunderm fleis, ier wellet das Sachsn recht auch sein wider tail das recht weiter schiebn, damit der Newnhoffer meinen herrn von Starchenberg zw solichem tag komen mug, das wellen mein herrn willigkchleich und gern umb ewr wierdigkait verdienn. Gebenn zw Starchnberg am mitichen nach sand Merten tag anno lxxxiii

Hanns Oberhaimer||
pfleger zw Starchnberg