Erwierdiger genadiger herr, mein undertanig dienst sein eweren genaden zu voran berait. Genadiger herr, mich hatt der edel N. Sachs zu Almeck bestelt zu ainem rechten gen Lambach, das sich an erichtag nagst kunftig vor eweren gnaden ergen solde. Nachmals haben mir mein gnadig herren von Starhenwerg geschriben auf den montag kunftig ze Wallse bey in ze sein, das ich in nit gancz zuegesagt, sunder das si eweren gnaden schreiben, auch petlich bei eweren gnaeden erlangen, dasselb ewer recht ine ze willen zu erstrecken, also hat mir ir ambtman zue enboten, das ich iren gnaden namlich kome, da bei ich gedenck, ewer gnad sey von in gebeten und umb yeren willen geschoben. Ob aber des nit ist, bitt ich, ewer gnad welle umb meiner gebete willen das recht verlenngen, das wil ich umb ewer gnad das wierdig gotzhaus mit undertanigen willigen diennsten verdyen, verhoffe ewer gnad werde mich meiner bete nit verczeichen. Datum Steyer sambstag abent nach Martini anno etc lxxxiiio.

Euer gnaden

williger

Steffan||
Newnhover