Unnser andachtigs gepett zw Gott und guettwillig dinnst zuvor. Lieber phleger, wir schikchen euch hiemit ain copi ains freybrieffs von unnsern allergenadigisten herrn dem Romischen kaiser etc. ausganngen auf xx dreyling unnsers goczhaus pawwein, als ir vernemen werdett. Wann wir aber nun bericht werden, das unsers genadigen herrn herr Johannsen erczbischoffs zw Gran anwalld zw Tyernstain ausserhalb ewrs schreiben und pevelh in den sachen nichts hanndeln, bitten wir euch mit sundern vleissz als unsern gunstigen hern frundt, ir wellet uns auf des kaisers freybrieff ain schreiben geben und schaffen gein Tiernstain, damit uns daselbs die obgemellt unnser anczall wein mautt und aufschlagfrey furgelassen werde, und uns des nicht verczeichen, als wir des ain sunders ganncz vertraun zw euch haben, angesehen unsers goczhaus notturfft und schaden, darein wir das verganngen jar komen sein, wann uns die veindt zw Klosternewnburg all unnser wein genomen haben, uns und unser goczhaus mit solicher fuedrung bedennkchen und pevolhen haben, wellen wir allczeitt mit unnsern gepett gein Gott und in andern wegen treulichen umb euch verdienn. Ob ir aber an solher unser copi des gemelltn freybrieffs nicht ain genuegen oder glauben wollt haben, so gereden ||wir euch hiemitt in krafft des brieffs den rechten hawptbrief, so uns der anhaim kumpt, fur euch ze pringen und den gemellten anwallden zw Tiernstain auch furpracht und geczaigtt werd. Datum Lambach feria 4ta post Katherine virginis anno etc. lxxxiii.

Johanns etc. abbt zw Lambach