Dem erwierdigenn geistlichnn herrnn herrnn Johannsen abtt zw [Lambach] meinem genadigen herrnn ennpeut ich Wolfganng Podem vonn Staig mein willig unnd gehorsam [diennst zuvo]r. Ich fueg ewern genadenn zw wyssenn, das ich zw der zeit unnd ich es rechtlich woll geth[...] recht unnd redlich pei meinem wol vermugen unnd gesuntten leib ubergebenn habenn zw rechtter ubergab mein[...] elichnn hausfraun Ursula, des Leonnharttenn Schefman zw Herrenschuczczing elichen tochtter, mein guet mit aller zuegehorung gelegenn zw Staig inn Swannser pharr genanndt das Vischerguet unnd ist erbrecht von euch unnd ewern genaden gotzhauss inn solher maynnng, das sy das obgenandt guet mit aller seynner zuegehoerung in lebtag soll inhaben, nuczczen und nyessenn unverkumertt unnd nach irm abganngk soll es vallenn, wo es pillich hin vallenn sol angever. Sew soll auch das obgenandt guet gein der herschaft stiftlich und peulich halttenn. Unnd senndt ewr genaden unnd ewrn genaden gotzhauss dew offenn petzettel darumben das ewr genad der obgenantten meiner elichenn hausfrawn Ursula ein gewanndlichenn lanndtlewffing ubergab brieff darumben gebt unnd mit ewrn insigel annstat ewern genadenn gotshawss ververtigt unnd bestat. Unnd wenn ewr genad denn das also gethann hat, so gelob ich ewrn genaden fur mich unnd all mein eriben, euern genaden unnd ewern genaden gotzhauss hinfur inn ewer brieff unnd sigel auch vertigung nicht zw reden noch annders yemandt von unnsern wegenn pei meinen treun aides weys angevor. Auch ist zw merkchenn, das mein obgenanttew hausfraw Ursula ain gemacht hat auff dem obgenantten guet innhalt ain gemachtzbrief, dasselbig gemacht soll ir auch stat gehaltten werden unnd ir nachvoligen alles treulich ungeverlich. Unnd gib ewern genadenn darumben dew offen petzettel bewardt durich meiner vleissigenn gepet willen mit der erbern Mertt Wuffinger, burger zw Swanns unnd Leonhartten Ymblinger burger daselbs paider aufgedrukchtten petschadt, doch inn unnd iren paiden eriben an schadenn, daruntter wir unns mit unnsern trewnn aydes weys verpintten, alles war und stat zw haltten inhalt des briefs. Zewgenn unnd gepet umb der petschadt auch umb das insigl ann denn ubergabrieff sind die erbern Leonhart Main zw Staig, Hanns daselbs, Sigmundt Mair daselbs unnd Chuennczen doselbs unnd annder erber lewtt meniger. Geben nach Cristi gepurdt tausent vierhundert unnd darnach im vierunndachzigisttenn jar an sannd Scolasticatag des heyling junkchfrauenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 69-71, Nr. 3067