Ich Mert Schiesser, des Lienharttn Schornles weilent zu Irnfeld saligenn swester sun, ich Margret des yeczt genanttn Lienharttn Schornles seligen swester, ich Elspeth auch des benanttn Lienhartn Schornles saligen swester, und ich Anna, ich Margreth und ich Barbara, geswistred des offtgenanten Lienharttn Schornles saligenn kinder, wir bechennen alle aintrachttigleichenn fur uns und all unser erbenn und thuen kunt mit dem brieff allenn, den er furkumbt sehenn, horn oder lesenn, das wir unserm liebenn vettern und brueder Steffann, yeczt gesessen zu Irnfeld in Kembnater pfarr unsern gannczenn und vollmachtigenn gewalt geben habenn, gebenn im auch den wissenlich in crafft des brieffs von der erbschafft wegenn anligkunden und varunden guetz, so uns alle und in von unser liebm swester und muemen Anna weilent gesessenn am Kylach in Thalhaimer pfarr saligen eriblich anerstorbenn ist. Also das der obgenantt unser vetter und brueder Steffann solliche unser erbschafft an unser aller stat zu seinen hanntten sol einnemen, erfordern, ersuechen dar umb zu beclagenn in der guetikaitt, oder aber mit dem rechtenn, wie im das be¬gegen zu gewynn oder zu flust und zu allem rechtten auch darumb zu quittirnn und verschreibenn, zu gebenn, umb sigill zu pitten, ob sich das gepurt und was er in dem von unsern wegenn und an unser stat hanndelt oder tuet, das ist unser aller obgenantter gueter will ,als ob wir selbs in gegenburtikait persondlich da warn, taten oder getuen mochtenn und wellenn das stat und warlich halten an alles widersprechenn trewlich und ungeverde. Und des zu urkund geben wir im den offenn gewaltbrieff, beczeugt durch unser fleyssiger pet willenn mit des erbern Ottenn zu Czehetthoff des erwirdigenn gotzhawss Krembsmunster czehettmair und ambtman auffgedrukchttenn petschafft, doch im und sein erbm an schadenn. Und zu merer geczeugnnss haben wir auch fleyssig gepetten den erbern Hannsen Zeiler zu Pfarkirchen mit seinem auffgedrukchtem petschafft, im und sein erben an schadenn, untter die baide petschafft wir uns obgenantte alle fur uns und all unser erbm mit unsernn trewen an aides stat verpintten alles war und stat zu halten innhalt des brieffs. Geben an montag nach Letare in der vastenn nach Christi gepurd tawsennt vierhundert und im sechs und achttzigkstem jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 162f, Nr. 3137