Dem erwirdigenn in Gott und geistlichenn herren hern Johannsenn, abbt zw Lambach, unserm genadigenn und liebm herren, embietten wir ich Thomon zw Vatting, ich Magdalenn sein hausfraw, ich Wolfganng Schneider zw Albrechtshaim, ich Breid sein hausfraw, ich Paulls, Gorigen Pachzellten zw Niedernnenttarn sun, ich Hanns, ich Margrett und ich Barbara geswistrett, Liennhartten zw Adellpotting und seiner hausfrawnn Anna eliche kinder, unnser unttertanig gehorsam willig dinst zuvor, und fuegon ewrn gnaden zw wissenn, das wir unserm liebm vettern Symon Pachczellten, seiner hausfrawnn Kathrein und allen iren baiden erbenn recht und redlichen verkaufft haben all unnser erbschafft und gerechtigkaitt, so wir ungevarlichen gehabt haben an der Obernnhuebm mit irer zuegehorunng zw Oberennttarn gelegen in Gebollczkircher pfarr, die dann erbrecht ist von ewrn gnaden und ewr gnaden goczhaus, bitten wir ewr gnad mit sunderm diemuettigem vleiss, welle dem genantten unserm vettern Symon Pachczellten, seiner hausfrawnn Kathrein und allen iren baiden erbenn umb die vorgemellt unnser erbschafft und gerechtigkaitt in der gemellten hueben ain kauff brieff nach gewonnhaitt ewr gnaden goczhaus mit ewr gnaden innsigl verfertten und gebenn. So das beschehenn ist, globen wir ewrn gnaden hiemit in krafft des brieffs mit unnsern trewn an aidestat furpaser in ewrn gnaden brieff, sigl und verferttigung nicht zw reden noch da wider ze thuen in kainerlay weiss getreulich und ungevarlichenn. Zw urkundt gebenn wir ewrn gnaden des allso die offenn pettzettl mit der erbernn Kollman Alltenhofer, ambtman ze Gaspaczhofenn, und Hannsen Ofennlueger, ambtman gein Starhennberg, baider aigenn zwrugk aufgedrukchten pettschafftn, dew wir obgenantt erben all mit vleiss dar umb gepetten habenn, doch in und irn erbenn an schadenn. Zeugen der gepett umb das innsigl und petschafft sein die erbernn Wolfganng Widmer zw Kirichdorff, Thoman Huebmer daselbs, und Thoman Grueber purger zw Hag. Geschehenn an mittichenn vor sand Niclastag anno domini im sybennundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 209-211, Nr. 3172