Dem erwierdigen geistlichnn herrnn herrn Johannsen, abbt zw Lambach, unnserm genadigen herrnn, empewt ich Sigmundt Lewttner, burger zw Swanns unnd Margreth sein hausfraw unnser willig unnd gehorsam dienst bevor. Wir fuegen ewern genadenn zu wyssenn, das wir recht und redlich verkaufft unnd kaufflich zw kauffen gebenn haben unnserm lieben swagern unnd swestern Petter Annczentaler zw Smidhaim inn Unnkchnawer phar unnd Waltpurga seynner hausfraun unnd alln irn payden eriben, dew sew habenn oder noch chunfftigklich gewingen, meines obgenantten Sigmunden geleichen eribtaill, so ich den unngevorlich gehabt han an dem Otguettlen gelegen zw Riczling inn Atzpekcher phar, das dew zeit der Storer ingehabt hat unnd gehort mit der herschafft euch unnd ewern genaden gotzhawss zue, umb ain summa gelt, der wir von inn zw rechten tagen an allen schaden recht und redlich schon bezalt sein worden. Unnd senden ewrn genaden darumben dew offen petzettel unnd pitten ewr genad, yer welt dem obgenantten unnsernn lieben swager unnd swester ein gewandleichenn lanndtleuffing kauffbrieff darumben geben unnd mit ewern genaden insigel ververtigen und bestatten. Unnd so ewr gnad den das also gethan hat, so geloben wir ewrn genaden fur unns unnd all unnser eriben euch unnd eurn genaden gotzhaws inn ewr brieff unnd sigel auch vertigung nicht zw redenn noch anders yemandt von unnsern wegen pey unnsern treun aydes angevor, unnd gebenn ewrn genadenn darumben dew offenn petzettel, bewardt durich unnser vleissigenn gepet willenn mit des erberen weysen Leonhartten Vorstter zw Egellaw, ambtman ewr genadenn aygnen aufgedrukchtten petschadt. Und zw pesser sicherhait haben wir auch mit vleis gepetten den erbern Wolfganng Kursner, burger ze Swanns, das er zu zeugnus der sachen sein petschadt auff dew zettel gedrukcht hat, doch inn und irn paydenn eriben an schaden, daruntter wir unns mit unnsern treun aydes weys verpintten alles war unnd stat zw haltten inhalt des brieffs. Zeugen der sachenn unnd gepet umb die petschadt, auch umb das insigel ann denn kaufbrieff sind die erbern Taman Lewttner in der Aw, Wolfganng zu Enzelsperig aus Otzpekcher pharr, Ulreich Germair zw Smidhaim aus Unkchnawer phar, unnd ander erber lewtt meniger. Geben nach Cristi unnsers herren gepuert tausent vierhundert unnd darnach im acht unnd achzigisten jar an phincztag nach sand Dorothee tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 212f, Nr. 3174