Erwirdiger geistlicher lieber herr, ewern gnaden sein mein willig dinst bevor. Als ich ew vor ettlicher zeit uber weilent Wolfel Fleischackher zu Lambach gelassen witibe umb xiiii lb. den. die mir umb iiii ockhsen unbezallt von ir ausstenn khlagt und bezallung von ir ze schaffen gepeten, dar auff ewer gnad an mich begert, ich sulle ew bemeltes geltz porgen und ansten lassen bis auff rechung der witib und irs knechtz, alsdann sull ich an verrer wagrung bezallt werden, des aber bisher nicht bescheen, daraus mir merckhlicher schaden erwagkhsen, ewr gnad und menigkhlich das ermessn und versteen mag, weil ich aber ew auf ewer begeren der schuld geporgt und angestelt, erkenn ich ew deshalben fur mein bezaller, wais auch an nymandt annders sunder an ew das zu ervodern, bitt darauf ewer gnad in sunderm vleis mich bemelter summa geltz an lennger aufschub zu entrichten, auch was ich des lanngen verzug schadn gnomen und darob erlitten, dar aus zu entheben, will ich sambt der pilligkkhait umb ewer gnad verdienn, beschech aber des nicht wurdt ich ewern, wo ich die betratt zu recht darumb aufhalden, des ich doch lieber vermiten belibe. Hierauff bit ich ewer gnaden verschriben antbort bei dem boten mich darnach wisse zu verrichten. Actum Wirting eritags nach invocavit anno etc. lxxxviiii.

Wolfganng Hewpacher||
herrn Casparn Perckhaimer diener.