Wir Johanns von gots genaden abbt zw Lambach, bekennen mit dem brieff, das fur uns komen ist Ellspett, Jorigenn ze Pallenstorff hausfraw, und hat mit wolbedachtem muett und guettem willen recht und redlichen verkaufft all ir erbschafft und gerechtigkaitt, so sy iecz ungevarlichenn gehabt hat und ir von irer muetter Kathrein saling erblichenn zuegefallen und anerstorbenn ist in der Vorsthuebm ze Oberczeidlarnn in unnser pfarr ze Lambach und in der huebm zu Grechshainn mit iren zuegehorung in Penewannger pfarr gelegenn, die dann baid erbrecht sein von uns und unnserm goczhaus, und hat die zw kauffenn geben irem liebm bruedernn Jorigenn Kreussen und allen sein erbenn umb ain summa gellts, der sy von m ganncz und gar ausgericht und beczallt wordenn ist zw rechten tagen an allen schadenn. Auf solichs patt uns die obgenantt Elspett mit diemuettigem vleiss, das wir dem genantten irem bruedern Jorigenn und allen sein erbenn die obgemellt ir muetterliche erbschafft und gerechtigkaitt in den bemellten zwain huebm mit iren zuegehorunng genadigklich geruechten zw bestatten und zw verleichenn, das wir dann allso hiemit in krafft des brieffs gethann habenn, was wir in rechtleichenn darann bestattenn und verleichenn sullen oder mugen, doch das man uns und unserm goczhaus alle jar jarlichen davonn raichen und dienn soll nach innhallt der allten erbbrieff, so uber die gemellten huebm lautten und sagenn und unnsers goczhaus urbarpuech. Es ist auch die obgenannt Ellspett fur sich und all ir erbenn des obgemellten irer erbschafft und gerechtigkaitt muetterlichs erbs in den beruertten zwain huebm mit iren zuegehorunng des genantten ires bruedernn Jorigenn Kreussen und seiner erbenn recht gewernn, versprecher und fuerstantt fur alle rechtleiche ansprach, wo und wann in des nott und durfft beschiecht mit dem rechtenn alls dann solichs kauffs und lanndes ob der Enns recht ist angevar. Wir offenn auch, das sew kainerlai wanndlung damit nicht haben sullen in kainerlai weiss an unnser hanntt und guetten willen und sullen uns auch alles das davon leydenn und dullden, das annder unnsers goczhaus erbler gein uns leydentt und dulldentt unverczigenn unnsers goczhaus rechten in allen sachenn. Zw urkundt geben wir in des allso den offenn brieff besigelltenn mit unnserm anhanngunden innsigll, der gebenn ist als man zallt nach Cristi gepurd vierczehenn hundertt und im newnundachczigistenn jarenn an erichtag nach sand Juliana tag der heyling junkchfrawenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 253f, Nr. 3208