Dem erbirdign und geistlichn herrn herrn Johannsn abte zw Lambach meinem genadigen herrn enpewtt ich Sigmund, des Ulrich Vischer sun zw Hattenperg, mein willig unntteranig diennst zuvor und fueg ewren genaden zw wissen, das ich recht und redlich vermacht hab meiner lieben edlichen hawsfrawen Margretten, Lienhartten des Snnid zw ober Reger salligen tachter, viertzigk phunt phenning zw rechter freyer margengab, dy selb yetz genant sum geltz zaig und vermach ich ir auff dem guett zw Hattenperg, das von euren genaden und von dem erbirdigen convent und gotzhaws erb herruert. Auff sollichs pitt ich eur genad mit unntertanigen vleis, eur genad welle ir ain gebondlichen margengabbrieff under eurem insygl darumben verferttigen und bestatten, und so eur genad das also gethan hatt, alls dan glob und versprich ich euren genaden in eur insygl nicht zw reden in kainerlay weis angever, und send euren genaden darumben dy bettzettl verpetschafft durich meiner vleisigen pet billen mit der erbern und weisen Merten Schuester zw nider Reger, die zeit under ambtner der regerischen aigen, und Hannsen Krutzinger, die zeit ainer des ratts der stat Vekchlaprugkch mit irer baider auffgedrukchten petschafft, doch in und iren erben an schaden, dar under ich mich verpund alles war und satt zw hallten, das der brieff inhellt. Zewgen der gebett umb eren genaden insygl, auch umb dy petschafft sein dy erbern und weisen Thaman Perner, purger zw [Vo]cklaprugkch, Lienhart Vischer am Vischlechen, Wolfgang Aicher am lechen [in R]eger phar. Der brieff ist geben an suntag vor sand Mathews tag [im ne]wnundachtzigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 283f, Nr. 3232