Dem erwierdigen geistlichen meim genadigen herren herrn Johannsn, abbt zu Lambach, enpewt ich Bangratz Hakhl zu Strasham mein willig dinst. Fueg ewrn gnadn zw wissn, das ich anstat Ursula, Margretn, Waltpurgn geswisstred der vollign gwalt ich hab von bemelter Ursula di sich umb di zwai ir geswisstred, di nicht vogtper sind, angenomen hat, dafur ich mich dann auch auff pevellich meins gwalts wissnlich annimb und fur all ir erbn von der erbschafft und gerechtikait wegn, so die benantn meine kinder haben gehabt auff dem Slechhoff in Welsser pharr gelegn und ewrn gnadn und dem wierdign goczhaws Lambbach dinstper guet ist, verkaufft und zu kauffn gebm habn dem erbern maister Sigmundn Pawrnschiekh und allen sein erben, als ewr gnad an dem betbrieff hiein vernemen ist. Genadiger herr pitt ich ewr gnad diemuetiklich anstat der benantn meiner kinder, ir wellet im uber sollich meiner kinder erbschafft an dem gemeltn hoff seiner zuegehorung mit aim kaufbrieff nach des wierdign gotzhaws gerechtikait versarign, gelob ich anstat der vorgemeltn meiner kinder fur sew und ir erben furpaser in ewr gnadn verferttigung nichtz zu reden noch dawider zu thun in dhainerlai weis sunder war stat hallten und will das undertaniklich verdien. Mit urkund des betbrieff bewart mit des erbern Jorigen Mullechner, ambtman aign aufgedruktn petschafft, den ich mit vleis darumben gepetn hab, dach im sein erbn an schadn, und zu zeugnuss der sach hab ich auch mit vleis gepetn den erbern Jorign Aschl, purger zu Wells, das der sesambt sein petschafft auff den brieff gedrukt hat, doch im und sein erbm an schadn. Gebm am sambstag nach sand Erhartz tag anno etc. lxxxx jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 288f, Nr. 3236