Dem erwirdigen in Gott unnd geistlichenn herrn herr Johannsen, abbte zu Lambach, ennpewt ich Andre zu Achlewttn in Ottnanger pharr gesessen, und ich Hanns zu Wilhelsperg in Meckenhofer pharr gesessen, unnser undertanig gehorsam willig dinst bevor. Wir fuegen ewren gnaden zu wissen, das wir all unnser erbschaft und gerechtikait, so wir gehabt habm an und auf dem Mitternguet zu Puechlewtten mit aller rechtlichen zugehorung in Gaspoltshover pharr gelegen in Starhemberger gericht, das dan euch und ewrer gnaden gotshaws Lambach urbar dinstparigs guet ist, zu stetem ewigen kawf kewfflich verkawft habm unnserm lieben aiden und swagern Hannsen zu Puechlewtten, der yetzund hewslich darauf sitzt, Anna seiner elichen hawsfrawn und allen irn erbm, dy sew habm oder noch kunftigklich miteinander gewingen auch mitsambt den alten kindern, dye der obgemelt Hanns bei seiner vordern weib hat, umb ain summa gelts, daran unns yetz und hinfuran wolbenuegt und der von in schon entricht sein zu rechten tagen an alln schaden und abgang. Darauf bitten wir ewr gnad mit allem und sunderm vleis, welle denselben unnserm aidn und swagern Hannsen zu Puechlewtten, Anna, seiner hawsfrawn und alln irn baidn erbm auch mitsambt den alten kindern ain genuegsamen lanndtlewffigen kawfbrieff daruber verfertigen, und wan ir das also gethan habt, so globen wir ewr gnaden fur unns und all unnser erbm in ewr gnaden verfertigung und in sigll nicht zu reden vill noch wenig, sunder mit unnsern willigen dinsten umb ewr gnad verdienen. Und des zu warm urkundt sendten wir euch die versorgnus unnder des erbern weisen Wolfgang Hainpuecher, an den zeiten ewr gnaden ambtman aufgedruckten petschadt, den wir mit vleis darumben gepeten habm, doch im, sein erbm an schaden, under das petschadt wir unns obgenannt verpintten bei unnsern trewen an aides weis alles das war und stett zu hallten in halt des petbriefs. Zewgnis der sachen und der gepett umb ewr gnaden insigel und umb das petschadt sind di erbern Wolfganng Sigkinger, Lienhart Sneider zu Gebaltzkirchen, Hanns Sneider abm Pachmansperg und ander frumerlewt genueg. Geschehen an montag nach invocavit in der vasten nach Krists gepurde viertzehenhundert und im vierundnewntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 409f, Nr. 3337