Wir Maximilian von gots gnaden Romischer kunig, zu allenn tzeiten merer des reichs, zu Hungern, Dalmatien, Croatien etc kunig, ertzhertzog zu Osterreich, hertzog zu Burgundi, zu Brabannt zn Ghelder etc. grave zu Flandern, zu Tirol etc bekennen, daz unns unnser getrewr Hanns auf der Od und die erbern Margreth, Hannsen Gartner zu Tullen hawsfraw, Elsbeth des gemelten Hannsen auf der Od swester, Dorothea Wolfganngen Smid zu Neidharting hawsfraw und Margreth, Hannsen Ledrer hausfraw ainen drittail zehennt grossen und klain auf zwain huben eine genannt die Smalwisen, die annder genannt zu Weispach in Penewannger pharr gelegen, unnser lehennschafft unnsers furstentumbs Osterreich, irm offen besigelten brief aufgesanndt und unns diemutiklich gebeten haben, den der erbern Anna weilennt Jorgen Ledrer in der Rewt witib zuverleihen, wann sy ir den verkaufft hieten, so hat unns dieselb Anna diemutiklich gebeten, das wir ir auch ain drittail zehennt auf den obbestimbten zwain huben der berurten unnser lehenschafft geruchten zuverleihen, wann der ir erb were, das haben wir getan und haben der genannten Anna den berurten zehennt verlihen, verleihen auch wissenntlich mit dem brief, was wir ir zu recht daran verleihen sullen oder mugen, also daz sy und ir erben den nu hinfur von uns und unnsern erben in lehennsweis innhaben nutzen und niessen sullen und mugen als lehens und lannds recht ist ungeverlich. Mit urkundt des briefs geben an eritag nach sannd Michels tag nach Cristi geburde viertzehenhundert und im vier und newntzigisten unnserr reiche des romischen im newnten und des hungrischen im funfften jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 441f, Nr. 3362