Getrewer, wir enphelhen dir ernstlich und wellen, das dw die ersamen geistlichen unnser lieb andechtig n. unnseren preletten, so mit ieren wein an unser mawt deiner verwesung frei zu faren vermain mit irer gewonnlichen anzall weins, die dir ain yeder benennen solle auff purgschafft unnser stathallter und regennten zu Wienn ir freyhait, der sy sich deshalben zu haben beruemen, zu berichten an derselbm unnser mawtt mawtfrei und an all ander irrung fueren lassest, doch in furhalttesst, welh mer dann sein gwonlich anzall ist, fueren oder ansagn oder die freyhait nicht furbringen wurden, das wir dann die selbn ir freyhait abschaffen und hinfur nicht gebrauchen lassen wellen, daran tustu unnser ernstlich maynung. Geben an mitich vor Maximiliani anno etc. 94 unnserer reiche des Romischen im newntten und des Hungrischen im funfften jaren.