Nicolaus dei et apostolice sedis gracia episcopus Ypponensis, reverendissimi in Christo patris et domini domini Christofferi eadem gracia episcopi Pataviensis in pontificalibus cooperator, universis et singulis ad quos presentes nostre litere pervenerint salutem in domino sempiternam. Auctoritate ipsius reverendissimi domini nostri Pataviensis anniversariam dedicacionis festivitate parrochialis ecclesie sanctorum Johannis Baptiste et Johannis Ewangeliste in Lambaco ad instanciam devoti fratris Wolfgange plebani eodem tempore, transponimus per presentes ut de cetero futuris temporibus dominica proxima post festum sancti Kyliani annuatim celebretur. Igitur ut ecclesia predicta congruis frequentetur honoribus a christifidelibus que iugiter ac decenter muniatur atque fideles ipsi eo libencius devocionis causa ad illam confluant quo ibidem celestis dono gracie uberius sese conspexerint esse refectos, nos de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis utriusque sexus christifidelibus vere penitentibus et confessis qui dictam ecclesiam et altaria eiusdem in nativitatis, circumcisionis, epiphanie, cene, parasceves, resurreccionis, ascensionis domini nostri Jesu Christi, penthecostes, trinitatis et corporis Christi singulis gloriose virginis Marie, omnium sanctorum, omnium apostolorum necnon ipsius ecclesie patrociniorum et dedicacionis festivitatibus devote visitaverint et ad reparacionem, conservacionem, manutencionem, augmentacionem eiusdem necnon calicum, librorum, luminariumque atque aliorumque ornamentorum ecclesiasticorum manus suas promptas porrexerint adietrices de quolibet festorum predictorum xl dies criminalium et lxxx venialium peccatorum singulis que dominicis ac aliis quibuscunque diebus caritatum porrexerint, subsidia triginta dies criminalium et sexaginta venialium peccatorum de iniunctis eis penitenciis misericorditer relaxamus in domino presentibus futuris perpetuis duraturis. In cuius rei evidens testimonium robur premissorum iussimus suprascripta sigillo nostro pontificali hic infra appenso communiri ac roborari. Datum et actum Lambach anno domini millesimo quadringentesimo nonagesimosexto, die martis septima mensis iunii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 483f, Nr. 3401