Dem erwirdigen in got geistlichen herren herrn Johannsen abbt zu Lambach meinem genadigen herrenn empewt ich Wolfganng, des Lippm sun zu Vischen mein gehorsam willig dinst bevor, und fueg ewrn genaden ze wissen, daz ich recht unnd redlich verkaufft und ze kawffen geben hab Hannsen, meinem lieben bruedrn, seiner hawsfrawn Magdalena und iren baiden erben ain halben drittail an und auf dem lehen ze Vischen in Swannser pfarr gelegenn, erbrecht von ewrn genadnn unnd ewr genaden gotzhawss umb ain summa gellts, der ich von im zu rechtn tagen an allen schaden ganntz ausgericht und betzallt worden bin. Hierauf bitt ich mit diemuetigen vleis ewr genad welle den berurten halben drittail des bestimbten lehenns dem genannten meinem brueder dem Hannsen seiner hawsfrawen Magdalena und iren baiden erben genedigklich bestatten und verleihenn und daruber genuegsamlich kawfbrief mit ewr genaden innsigl ververttigt geben, daz beschehen gelob ich fur mich und all mein erben in solich ewr gnadn bestatt brief unnd sigl nit ze reden noch dawider ze thun in kainer weis, sonnder ausweisunng derselben stathalltunnd umb ewr genad alltzeit gehorsamlich zu verdienn. Des zu urkunnd sennde ich ewrn genaden allso dy offenn petzetl, unnder des erbernn Lienharten Vorster, ewr genaden ambtman am Stadl aufgedrukhtem petschadt, den ich mit vleiss darumb gebeten hab, doch ewrn genaden ewrem gotzhauss und nachkomen, auch demelben Vorster und seinn erben on schaden in allen sachen. Des sein zewgn Wolfganng Apinger burger zu Swanns, Wolfganng von Ernnsperg unnd Wolfganng Winntter zu Hueb. Geben an freitag vor sannd Erasmstag anno domini et im lxxxxvii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 530f, Nr. 3434