Dem erwirdigenn in got und geistlichen herrn hern Johanns abbt zu Lambach meinem gnedigen herrn embewt ich Agnes, Wolffgangs Mitterhofer, purger zu Lyntz eelich hawsfraw fur mich und an stat meiner geswistred Thoman und Regina weilend Hannsen Wegers zu Wells seligen kinder unser gehorsam dienst zuvoran. Ich fug ewrn gnaden ze wissen, das ich den benanten meinem lieben hawswirt befolhen und gewalt geben hab mit craft der offen petzedl, das er von ewrn gnaden als lehenherrn an stat mein, meiner geswistred zu unsern handen lehen empfahen sol und mag uber die wisen mit der peunten beim Grunpach und auf dem Wagrain inhalt vorausganngen brief und sigl, so ewrn gnaden furbracht wirdt, ewr gnad demuticlichen bittend, wellet geruechen dem obbenanten meinem hawswirt an stat unser zu unsern handen zu verleihen, das wellen ich mitsambt meinen geswistreden allzeit demuticlich gehorsamlich verdienen. Mt urkund des briefs bewart mit der erbern weisenn Pangratzen Krabl, ewr gnaden vorstambtman, und Peter Stainer, statschreiber zu Wells aufgedruckten petschadten, so ich Agnes Mitterhoferin fur mich und an stat benanter meiner geswistred vleissig darumb gepeten hab, wann mein geswistred ditsmals nit vogtbar sein, under die petschad wir verpunden sein inhalt der petzedl war vesst ze halten. Geben an freitag nach Lupoldi anno domini etc. lxxxxviii

o

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 584f, Nr. 3481