Dem erwirdigen geistlichen unnserm genedigen lieben herrn herrn Johannsen, abbt zu Lambach enbietten ich Magdalena dy Peckhin zu Rewthaim, Wolfgangen Smids zu Lambach muter, ich Hanns des Raydlens sun im Holltz im Lochkircher pharr, und ich Wolfgang, Erharten Schawnberger zu Uberhuling sun anstat mein und meiner geswistredt Katherina, Erharten, Ursulen und Sigmunden, dy noch nit vogtper seinn, dafur ich mich gewalt annymb unnser gehorsam willig dinst bevor und fugen ewrn genaden ze wissen, daz wir recht und redlichen verkauft haben das gut zu Rewthaim an den Vleischacker daselbs gelegen mit seiner zugehorung und ist urbar und dinstper ewer genaden und ewrem gotshaws, und haben das ze kauffen geben Chunraten am Lerpuhl, Margrethen seiner hawsfrawn und iren paiden erben umb ain summa gellts, der wir von in ganntz und gar ausgericht und betzalt worden sein zue rechten tegen on allen schaden, darauf bitten wis mit diemutigem vleis ewer genad geruche daz bemelt gut zu Rewthaim seiner zugehorung benanten Chunraten am Lerpuhl seiner hawsfrawen Margrethen und iren paiden erben genedigklich zu bestatten, zu verleihen und genugsam brief und sigl daruber ze geben, geloben wir fur unns, auch die dafur wir unns annemben all unnser und derselben erben ewern genaden in sollich ewer bestettung brief und sigl nichts ze reden noch dawider ze tun in kainer weis, sonnder alles das dyselben ewer brief und sigl ausweisen stat halltunde gehorsamlich umb ewr genad zu verdinen. Zu urkund sennden wir e. g. des allso den offenn petbrief mit der erbern Sigmunden Semlpawern, ewr genaden ambtman und Wolfgangen Smids, ewr gn. burger zu Lambach beder aufgedruckhten petschaden bewart, dy wir mit vleis darumb gebeten haben in und iren erben on schaden, der sein zewgen Lienhart beym Gatern zu Rewthaim, Wolfgang Zangkl an der Zanngklmul und Walther zu Watzing. Geben an Eritag vor dem heiligen auffarttag anno domini im newnundnewntzigisten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 606f, Nr. 3502