Dem edln Kylian Leroch am Stadl embietn ich Lienhart Paschlperger und wir hienach benent sein porgen Wolfgang Scherer zu Helking, Jorg zu Cappellen, Lienhart Synnhuber und Liennhart Fynnsyn am Paschlperg gesessen unnser willig dinst bevor und fugen ew ze wissen, alls ich benanter Lienhart Paschlperg umb schuld, ungehorsam und drowort darumben ich dann swere leibstraff wol verdient, zu Lambach von dem edeln vessten Sebastian Payssen, hofrichter daselbs venckhlich angenomen und aber aus furbet frumber lewt der vennckhnus und straff begeben bin, daz ich fur mich und menigklich bey meinem ayd, eren und trewen geredt und gelobt hab nyemands von solher venckhnus und alles wegen so mit mir gehandlt ist, destveinter ze sein noch daz ze rechen kainer weis solliches wir dann benant porgen zu sambt im gelobt haben bey verliesung unnser aller hab und gut und darauf des bemelten Paschlperger recht porgen worden sein nach lawt aines urfechbriefs, der ewch hiemit auch furbracht wirt in dinstlichem vleis bittund, wellet denselben brief mit ewrem insigel, alls ir daran ze tun sehen werdet verfertigen, geloben wir all benant selbgschol und porgen in sollich ewer insigl und verfertigung nit ze reden noch dawider ze thun bey unnseren ayden, eren und trewen, sonnder alles, so derselb brief innhellt alltzeit stett unverbrochenlich haltund mit unnseren willigen dinsten umb ew zu verdienen. Zu urkund sennden wir ew des allso den offenn petbrief unnter der erbern maister Pawlsen Smids und Hannsen Hynnterpeckhen baider burger zu Lambach aufgedruckhten petschad, bewart, dy wir mit vleis all obbenant selbschol und porgen samentlich darumb gebeten haben in und iren erben on schaden. Geben an eritag vor sand Steffans des heiligen martrer tag anno domini etc im newnundnewntzigisten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 619f, Nr. 3441