Literae indulgentiarum. Raphael, Ostiensis, Dominicus, Portuensis, Alexander, Tusculanus, et Nicolaus, Albanensis, Episcopi; Thomas, titulo sancti Martini in Montibus, Antonius, titulo sanctae Praxedis, Achilles, titulo sanctae Mariae in Transtyberim, Laurentius, titulo sanctorum Quatuor Coronatorum, Adrianus, titulo sanctae Sabinae, Johannes, titulo sanctae Balbinae, Johannes ....., titulo sancti Johannis ante portam latinam, Andreas, titulo sanctae Priscae, Bonifatius, titulo sanctorum Nerei et Achillei, Johannes Baptista, titulo sancti Appollinaris, Scaramutia, titulo sancti Ciriaci in Thermis, Dominicus, titulo sancti Clementis, Laurentius, titulo sanctae Anastasiae, Ferdinandus, titulo sancti Pancratii, Silvius, titulo sancti Petri ad vincla, et Christophorus, titulo sanctae Mariae in aracoeli, Presbyteri; Marcus, sanctae Mariae in via lata, Johannes, sanctorum Cosmae et Damiani, Nicolaus, sancti Viti in Macello martirum, et Hercules, sanctae Agathae, Diaconi; miseratione divina sacrosanctae Romanae Ecclesiae Cardinales: Universis et singulis Christifidelibus praesentes literas inspecturis Salutem in Domino sempiternam. Quando frequentius fidelium mentes ad opera caritatis inducimus, tanto salubrius animarum suarum saluti consulimus. Cupientes igitur, ut ecclesia sive Capella beatae Mariae virginis in Arnnstorf seu Moslan (d.i. "am Mösl"), quae parochialis ecclesiae in Lamprechtshausen Salzeburgensis dioecesis filialis existit, congruis frequentetur honoribus et a Christifidelibus iugiter veneretur ac in suis structuris et aedificiis debite reparetur, conservetur et manuteneatur, necnon libris, calicibus, luminaribus, ornamentis ecclesiasticis et rebus aliis divino cultui inibi necessariis decenter muniatur, utque Christifideles ipsi eo libentius devotionis causa confluant ad eandem et ad reparationem, conservationem, manutentionem ac munitionem huiusmodi manus promptius porrigant adiutrices, quo ex hoc ibidem dono coelestis gratiae uberius conspexerint se refectos, Nos Cardinales praefati videlicet quilibet nostrum per se supplicationibus dilectorum nobis in Christo Reverendi Patris Domini Wolfgangi Nagel Abbatis totiusque Conventus monasterii in Paiern necnon victricorum et communitatis hominum dictae filialis ecclesiae nobis super hoc humiliter porrectis inclinati, De omnipotentis Dei misericordia ac beatorum Petri et Pauli, Apostolorum eius, auctoritate confisi, Omnibus et singulis Christifidelibus utriusque sexus vere poenitentibus et confessis, qui dictam ecclesiam sive Capellam filialem in singulis, videlicet Resurrectionis Domini Nostri Jesu Christi, Inventionis sanctae Crucis, feria quarta Pentecostes et Assumptionis beatae Mariae virginis necnon ipsius ecclesiae sive Capellae filialis dedicationis festivitatibus et diebus a primis Vesperis usque ad secundas Vesperas inclusive devote visitaverint annuatim et ad praemissa manus porrexerint adiutrices necon tribus Sabatis diebus post festum sancti Michaelis Archangeli proxime et immediate sequentibus ("Goldene Samstage") Vesperis seu aliis divinis officiis, quae in eadem ecclesia sive Capella filiali celebrantur, interfuerint, pro singulis festivitatibus et diebus praedictis, quibus id fecerint, centum dies de inunctis eis poenitentibus misericorditer in Domino relaxamus. Praesentibus (literis) perpetuis futuris temporibus duraturis. In quorum fidem literas nostras huiusmodi fieri nostrorumque sigillorum iussimus appensione muniri.