ICh wernhardt der Grans vergich offenbar an disem brieff allen den, die in ansehent oder lesen hornt, das mir das war gewissen ist, das mein lieber vatter her ludwig der Grans mit seinem guten willen geschafft hat zu ainem ewigen selgra^et vmb seiner sel hail vnd vmb seiner vodern sel dem Goczhawsz ze Maurkirchen das wisel pei der luczeltrat, des zway tagwerck sindt vnd das er gechaufft hat vmb sein aigenlich gut, vnd darumb, das dem vorgenanten goczhaus zu Maurkirchen dhain krieg vmb das vorgenant wisel icht wider ge, so gib ich im disen meinen brieff uersigelten mit meinem jnsigel nach meines lieben vater gepet, wann der selb jnsigels nicht enhat. Der brieff ist geben, do man zalt nach kristes gepurdt drewzehenhundert jar vnd darnach in dem vier vnd zwainczigisten jar an sand Johanns ewangelisten achten tag nach weinachten.

Source Fulltext: OÖUB 5 (Wien 1868) S. 373-374, Nr. 378