Wir hainreich, Ott vnd hainrich von gotes genaden pfalczgrafen ze Rein vnd herczogen in Bayrn ueriehen offenbar an dem brieff vnd tun kundt allen den, di jn ansehent oder hornt lesen, wan vnser vater vnd vetter vnd all vnser voruodern das Goczhawss zu Mawrkirchen mit besundern andachten vnd dinsten in den Ern vnd wirden der hochgebornen magt Gots muter sand Marie vnser frawn alle zeit gehabt habent, als wir chuntlich vnd aigenlich erfunden haben an den brieffen vnd hantuesten, die vnser frawen pfarrer vnd Capplan do selben von vnsern voruodern vncz her gehabt haben; vnd wan wir salig vnd gut weg, die vnser voruodern in gottes vnd seiner lieben muter dinst habent gehabt vnd gehandelt, pillich vnd auch gern durch vnser vnd gema^enicklichen durch aller vnser voruodern vnd nachkomen ewigs hail vnd sa^eld wellen pessern, meren vnd nicht mindern, Haben wir yeczod sunderleich angesehen vnd erchandt die genad, die vnser frawen pfarrer vnd Capplan ze Mawrkirchen von vns vnd von vnsern voruodern haben gehabt, als vns her Ortolff der Teuffenpeck, der nwn do selben pfarrer ist, mit vnsern vnd mit vnsrer. voruodern hantfesten vnd briefen beweiset vnd gejnnert hat, vnd haben dem selben Teuffenpecken, der manige jar vnd zeit, e er gen mawrkirchen ye kam, vnsrer besunder Capplan ist gewesen vnd noch ist, getan die genad, das wir wellen, das er alle die genad vnd recht hab, die sein voruodern her hilprant der weigselberger vberal in vnserm land an allen steten hat gehabt, vnd wann derselbig Teuffenpeck vor vnser besunder Capplan ist gewesen, haben wir jn als seinen voruodern yeczod von newen dingen zu vnserm besundern Capplan genomen Also, das wir wellen, das er vnd sein diener haben alle die recht, die vnser Capplan habent in dem hoff. Darzu haben wir vnser frawen ze lob, ze ere vnd ze dienst getan, das wir wellen, das der selb Teuffenpeck die genad vnd freyung sol haben, was er von wein, salcze, Getraid oder von andern Sachen zu seiner kost bedarff in seinem hawss, das im das frey sol fur gen an alle zolle vnd Mautt vnd an alle vodrung vberal in vnserm land an allen steten Darumb, das er got, vnser frawen vnd allen gotsdinst desterpas mug geenden, volfuren vnd gemern. Darzu wellen wir, das er hab zwen fischer in der Matichen vnd als die sein voruoder hat gehabt, vnd darzu wellen wir, das jm vnser jager ainer, welchen er nimpt, alle iar velle vnd antwurt ein rotwildt zu der hochzeit, die er beget mit dreyssig priestern oder mer an dem achten tag vnser frawen zu der schiedung, vnengolten seins leibs vnd guts gen vns vnd gen allen vnsern ambptlewten, wir thun auch dem selbigen pfarrer die genad, das wir wellen, das dhain vischa^er sol siezen dacz mawrkirchen dan sein zwen vischa^er, die wir im erlaubt haben. Darzu thu wir demselben Capplan dje genad, das er nem aus vnserm Schochen prennholcz, wie vil er bedarff in seinem haus, wir haben auch im die genad tan, das wir wellen, das dhain vnser ambtman vnser frawen lewt beswa^er mit dhainerlay werchart, vnd wann vnser frawen pilgerein ze Mawrkirchen nicht rechter chauff wider get, wellen wir, das nyemant chainen chauff da hab weder trucken noch nassen, Es sej dann mit des vorgenanten pfarrer willen vnd gunst. Die oben genad alle chrefftigen vnd Newen wir dem obengenanten Teuffenpecken mit dem brieff Vnd wellen vnd gebietten vnsern vicztumen, Richtern, Mawttern, zollnaren vnd gemainklich allen vnsern amptlewten, wie die genant sind, vesticklichen vnd Ernstlich bej vnsern hulden, das si im die oben genad alle ga^enczlich stet haben vnd mit nichtew vberfaren, Als sy vnser swa^er, gross vngenad wellen vermeden, wann wir im zu Eren vnsrer frawen noch mer wellen geben von vnserer aigen hab. Vnd das die obgenant genad ewicklich sta^et vnd vnzerbrochen beleiben, daru^eber zu ainem vrchundt geben wir den brieff versigelten mit vnserm jnsigel. der ist geben ze purckhausen, da von Cristes gepurdt waren drewzehenhundert jar, darnach in dem Newnden vnd zwaynczigisten jar an Sand maria magdalena tag.

Source Fulltext: OÖUB 5 (Wien 1868) S. 547-549, Nr. 548