Honorius episcopus seruus seruorum dei Dilectis filiis preposito et Capitulo Richersberge Salutem et apostolicam benedictionem. Justis petentium desiderijs dignum est nos facilem prebere consensum et uota, que a rationis tramite non discordant, effectu prosequente complere. Ea propter dilecti in domino filij uestris iustis postulationibus grato concurrentes assensu personas uestras et locum, in quo diuino estis obsequio mancipati, cum omnibus bonis, que impresenciarum rationabiliter possidetis aut in futurum iustis modis prestante domino poteritis adipisci, sub beati Petri et nostra protectione suscipimus. Specialiter autem ecclesiam Monesture uobis a bone memorie C. Patauiensi episcopo de Capituli sui assensu pia et prouida liberalitate concessam, sicut eam iuste, Canonice et pacifice possidetis, uobis et per uos ecclesie uestre auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre protectionis et confirmationis infringere uel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Paulj apostolorum eius se nouerit incursurum. Datum Laterani Idibus Maij, Pontificatus nostri anno decimo.

Source Fulltext: OÖUB 2 (Wien 1856) S. 657-658