C. In nomine sancte et indiuidue trinitatis Eberhardus dei gratia Salzeburgensis archiepiscopus apostolice sedis legatus. Dilectis in christo fratribus Friderico eiusque fratribus in Richersperch eorumque successoribus in Perpetuum. Cum pie desiderium uoluntatis et laudande deuotionis intentio pastoralibus studiis semper sint iuuanda, cura sollicitudinis est adhibenda, ut ea, que iusta et legittima ratione fuerint pertractata, in recidiuiuum (sic) scrupulum relabi non possint. Ea propter dilecti in domino fratres iustis uestris peticionibus facilem assensum prebentes constitucionem, quam felicis recordationis Heinricus prepositus uester ex hortationibus uestris et peticionibus ad hoc inductus fecisse dinoscitur ad consolationem et subsidium egrotantium fratrum quosdam speciales redditus deputando uidelicet decimam in Stalhouen totam, decimam in Shever, vineolam in Gru^obe cum aliis reditibus, qui in autentico super Hiis facto et sigilli tam sui quam Capituli appensione confirmato plenius continentur, auctoritate nostra confirmamus et presentem paginam super eadem confirmatione conscriptam nostri sigilli munimine roboramus. Siquis igitur prelatorum uestrorum, qui pro tempore fuerint aut alia ecclesiastica secularisue persona tam salubre statutum infringere attemptauerit, huic nostre confirmationi obuiando et semel atque iterum conmonitus non resipuerit, sciat se exconrnunicationi tamdiu subiacere, quam diu se a tam iniquo conamine non cohercet. Data apud Salzburgam iii. Idus Decembris Anno domini M.CC.XX.VII. Pontificatus nostri anno XX.VII.

Source Fulltext: OÖUB 2 (Wien 1856) S. 668-669