Cum iuxta verbum canonis omne, quod in federa pacis uenit, tunc solidius subsistat, cum scripture adiectio id affirmat et testibus astipulatur, quare Nos Vlricus Prepositus, Richerus Decanus Totusque Conuentus in Reichersperge omnibus imperpetuum presentibus declaramus, quod, cum Dominus Marquardus Plebanus in Zwenzendorf amicus Ecclesie nostre fidelis et specialissimus benefactor Claustrum Monialium apud nos propter vetustatem et incuriam collapsum et adeo efformatum, quod nobis alias multis debitorum oneribus et diuersis aduersitatibus pregrauatis nulla spes fuit illud sev possibilitas reformandi, ob spem diuine mercedis et remedium anime sue et antecessorum suorum intenderet aliquantulum restaurare, habitis hinc inde cum eo et cum aliis familiaribus nostris diuersis tractatibus nullam viam tuciorem ad hoc exquirere poteramus, quam quod res siue possessiones Monialium a rebus nostris sequestrate tantum a nobis ex collegio nostro assumptum per Procuratorem ad hoc ijdoneum dispensentur nec tamen idem propter hoc prebende sue emolimento carebit, quem etiam non nisi ex rationabilibus causis et euidentibus excessibus nobis et successoribus nostris liceat inmutare, qui etiam nobis semel in anno post Epyphaniam faciet rationes. Quare nos experta fide et deuotione ipsius et inspecta piissima voluntate assensum nostrum ad hoc prebuimus voluntarium et deuotum. Ex nunc gubernationi et dispensationi seu prouisioni Monasterii sancti — Monialium renuntiamus et successoribus nostris, preterquam expressum est, ordinandi in eodem Monasterio vel usurpandi nobis aliquid de rebus ipsius facultatem quamlibet adimentes et ut ipsius voluntati et desiderio satis fieret et sepedictum monasterium amplius reciperet incrementum, Nos de communi consensu de uisceribus nostris quasdam excerpsimus possessiones assignando eas dicto Monasterio perpetuo possidendas, quas etiam huic Pagine duximus inserendas, Duas curias villicales circa Mospurgam videlicet Talbach et Ampach cum Decima et minutis feodis ac aliis accidentiis ibidem, quocumque modo censeantur, Curiam in Tabel cum iugeribus et Omnibus accidentiis ibidem, Item Nouum Pomerium, Item Aream cum Orto apud Curiam villicalem, Item duo Iugera vinearum in Werde circa Chremsam, Item in Weinzvrlperg duo jugera vinearum, que adhuc iure precario a personis uiuentibus occupantur, quorum vnum uacat post obitum relicte Chunradi videlicet Domine Maehthildis, Reliquum post obitum trium personarum videlicet Rvgeri et duarum Sororum suarum Christinne et Chvnegundis. Census uero consuetus interim cedet dispensatori Monialium supradicto. ||
Predictus vero Dominus Marquardus volens habere certum et perpetuum Numerum videlicet XXIIIIor personarum in Monasterio prenotato, quibus daputauit quasdam possessiones de proprietate Ecclesie nostre, quarum quasdam iure precario tenuit, videlicet decimam in Mv^enichberg, Item Decimam in Mvnstevr, quam exsoluit pro LXX talentis, Item Decimam in Praitenaich conparatam a nobis pro x. talentis cum Prato Pistrine et Area cum Ortulo ibidem, Item Decimam in Reuel, Item duo iugera vinearum in Weinzvrlperg, que ad eum omnimode spectabant (sic per omnia). Uolumus etiam, ut tam ipsum Claustrum quam Predia eiusdem Monasterii eo iure gaudeant quo nos ipsi in lignis ad edificia et ad alia necessaria et pascuis et aliis libertatibus. Adicimus etiam, quod quicquid in Remediis et aliis obuentionibus rerum mobilium et inmobilium Dominabus accesserit, ipsarum recipiat dispensator. Promittimus etiam, quod dictum dispensatorem velud propriorum negociorum exsecutorem fauorabiliter prosequemur. Pratum circa Phaeffing et Ortum cum area Hospitalis Procurator Dominarum etiam possidebit et soluet inde x. solidos Custodi pro lumine annuatim. Si uero contingat dictum Hospitale denuo restaurari prouentibus equiualentibus x. solidorum redditus Custodi pro lumine reconpensentur. Igitur omne, quod infirmari uel uituperari potest, precaueri debet, maxime cum iure cautum sit, quod homines diuerse professionis non socientur in vno Monasterio, Uolumus, ut dictum Monasterium, sicut cicius fieri poterit, diligentissime obseretur nec absque manifesta, euidenti et rationabili causa ad eas aliqualium personarum introitus uel ipsis exitus concadatur. Earum etiam visitationem et correctionem nobis uidelicet Preposito et Decano solummodo reseruamus. Ut itaque omnia et singula hec seruentur et quelibet Ecclesia suis terminis sit contenta nec etiam Nos vel aliquis vel aliqui successorum nostrorum contra ea venire liceat (sic) vel presumant vel contra aliquod premissorum, Uolumus et statuimus et juris iurandi, quod quilibet nostrum in animam suam et in animas successorum nostrorum prestitit, astipulatione firmamus preter reatum periurii, quem incurrit, si Prelatus fuerit vel singularis persona, ipso facto sententiam Excommunicationis incurrat, quas sententias Reverendus Pater Dominus noster Wernhardus venerabilis Patauiensis Episcopus de nostro consensu in nos et successores nostros dinoscitur promulgasse. Si uero totus Conuentus uel partes in hoc deliquerint, interdicti et suspensionis sint sententiis innodati, jn qua si per mensem prestiterint (sic) animo indurato, ex tunc potestas nostra, quantum ad perficiendum et statuendum dictum Monialium Procuratorem, ad Prepositum et Conuentum Sancti Nycolai in Patauia deuoluetur ita, ut non Nos de cetero sed ipsi vnum ex nobis dicte amministrationi preficiant, sicut supra expressum est, quanto viderint oportunum. Ut autem hec nostre constitutionis ordinatio firma et inconuulsa permaneat, presentem Paginam tam Conuentus quam nostri Sigilli inpressione duximus robprandam. Acta sunt hec Anno Domini M°. CC°. Nonagesimo VIII°. In uigilia Natiuitatis Domini.||
||
Diese Erneuerung bekräftigte der Bischof Wernhart von Passau mit wörtlicher Einschaltung des obigen Diplomes:||
Nos Wernhardus Dei gratia Ecclesie Patauiensis Episcopus tenore confitemur presentium, quod dilectus in christo frater Dominus Vlricus venerabilis Richerspergensis Ecclesie Prepositus instrumentum infra conscriptum de verbo ad verbum suo et Conuentus sui Sigillis roboratum nobis exhibuit et tam sui quam Conuentus sui nomine petiuit illud in omnibus suis articulis per Nos auctoritate ordinaria confirmari. Cuius tenor talis est. (Das obige Diplom.)||
Nos igitur predictorum Prepositi et Conuentus in Reichersperg deuotis precibus inclinati maxime, cum premissa omnia ex necessaria et utili processerunt ratione et ne supradicti Marquardi plebani de Zwenzendorf olim Capellani nostri sincera deuotio fraudetur effectu, predictum instrumentum in omnibus articulis contentis in eodem excluso cuiuslibet preiudicio approbamus et confirmamus de certa sciencia auctoritate ordinaria in hiis scriptis mandantes sub uirtute sancte obedientie et penis in eodem instrumento contentis, quas ex nunc in transgressores dicti instrumenti ferimus in hiis scriptis, vt omnia suprascripta inuiolabiliter perpetuis temporibus obseruentur. In cuius Rei testimonium ad perpetuam firmitatem presentes damus Literas nostro Sigillo munitas. Datum Patauie Anno Domini M°. CCC. Nonas Decembris.

Source Fulltext: OÖUB 4 (Wien 1867) Nr. 314, S. 292-295