Wernhardus dei gratia Ecclesie Patauiensis Episcopus omnibus in perpetuum. Cupientes terrena, que ministramus in terris, in celestia felici conmutare conmercio. Ad hoc consideracionem nostram exponimus, quomodo religiosarum personarum dilatemus conmoda qualiterque emunitatem Ecclesiarum pro viribus fulciamus. Hinc est, quod nos pro nostre salutis augmento Ecclesie Richerspergensi ad deuotam instanciam uenerabilis in christo fratris domini Friderici prepositi ibidem ordinis sancti Augustini nostre dyocesis Volentes facere gratiam specialem Damus et concedimus ei in Patauia et Obernperge emunitatem libertatis in deducendis et adducendis sursum et deorsum Vino, Blado, Sale aliisque victualibus ad prebendam et mensam prepositi et Conuentus Ecclesie Richersperigensis prenotate pertinentibus eximentes illa ab omni prestacione, solucione Mute, Thelonei sev exactionibus cuiuscumque (sic). Sane prepositus predictus suo et Ecclesie sue et Conuentus nomine nobis vicissitudine spiritali concurrens Nos in fratrem sue Ecclesie recepit promittens nonminus firmiter quam sincere, quod post obitum nostrum fratrum suorum debeamus asscribi Catalogo, exequie nostre ac anniuersarius obitus nostri dies in Vigiliis, Missis, Elemosinis et eciam in consolacionem fratrum more, qui geritur mortuo dicti loci preposito in Richersperigensi Ecclesia, perpetuo debeat peragi et interminabiliter celebrari. In cuius rei testimonium ad perpetuam rei memoriam Presentes damus Litteras nostro Sigillo munitas. Datum Patauie anno domini M.CCC.IIII. VI. jdus Julii presentibus Vlrico preposito sancti Nycolai, Ortolfo de Muering Canonico et Vicedomino Patauiensi, Vlrico capellano, Ottone Notario nostro et aliis pluribus fide dignis.

Source Fulltext: OÖUB 4 (Wien 1867) Nr. 499, S. 463