Wier Ott Probst von Reichersperig vnd ynser Samenvnge wier veriehen an disem prief vnd tuen chvnt allen den, die disen prief lesent oder horent lesen, die nu lebent vnd hernach chvnftich sint, Daz wier mit veraintem mvet vnd mit guetleichem willen vnd durch notduerft vnsers gotshauses habe wier verchauffet den weingarten, der da leit in der widem, den weilent hat gehabt der ayswert ze leiben, denselben weingarten hab wier verchauffet vern Elspeten hern Ruegers witib, dem got genad, vnd iren erben vmb fonfzehen phvnt wienner mvnzze phenning vnd habent vns derselben phenning gar vnd gentzleich verrichtet vnd hab wier in den selben weingarten verchauft ze rechtem puerchrecht, verchauffen vnd versetzen vnd ze geben, swem si wellent vnd allen iren frum damit ze schaffen, als aigens vnd puerchrechtes recht ist in dem lande ze Osterreich, vnd schol die vorgenant ver Elspet oder ir erben oder wem si den vorgenanten weingarten geit, verchauffet oder versetzet, die schvllen zve einem vrchvnd vnd zve einem puerchrecht alle jar an sand Mychelstag zehen phenning geben vns den herren von Reichersperig oder vnserm anwalt. wer aber, daz si daz selbe puerchrecht versavmten zv dem egenanten tag, des engelten si, als puerchrechtes recht ist. vnd darvber zve einer sicherhait vnd zve einer bestetigung diser sach so geb wier Probst Ott von Reichersperig vnd auch die Samenvnge disen prief versigelten mit vnsern jnsigeln vnd sind derselben sach vnd der selben wandelung gezevg, die hernach benant sint, Daz ist her fridreich vnd her wernher die hevzzen Puergrauen ze Medlich vnd her Fridreich der hevzze von Redeprvnne, Her Leupolt auf dem Marcht, Her Engelprecht, Her Chvnrat der Rot, der Pendorfer vnd ander piderbe leut genuech, den disev sach wol chvnt vnd gewizzen ist. Der prief ist gegeben datz Chrems do von Christes gepuert warn ergangen Tausent jar, Drev hvndert jar darnach in dem Sibenzehenten jar An sand Paulestag des becherer.

Source Fulltext: OÖUB 5 (Wien 1868) Nr. 184, S. 182-183