Albertus dei gratia Patauiensis Episcopus Omnibus in perpetuum. Cvm non solum plantare sacram religionem sed et plantatam fouere canonica doceant instituta, Non minus deo gratum obsequium arbitramur impendere, cum Monasteria, que sinistris accrescentibus successibus ruinam minantur, ne in destructionem omnimodam labantur, subleuamus, quam si de nouo aliquid plantaremus et iam plantatum in nichilum redigi sineremus. Considerantes igitur, quod Monasterium Canonicorum regularium in Reichersperg, Ordinis sancti Augustini nostre dyocesis proch dolor iam ad tante destructionis precipicium est deductum, vt nisi de largo nostro et aliorum christi fidelium auxilio releuetur, ammodo adicere non valeat, vt resurgat, Nos ad faciliorem eius reformationem Ecclesiam Parrochialem in Taischirchen eiusdem nostre dyocesis ad Collationem nostram pleno iure spectantem de beneplacito et Consenssu Venerandi nostri Capituli eidem Monasterio donauimus et tradidimus ac mense Collegii eiusdem vniuimus, appropriauimus et incorporauimus cum omnibus iuribus et pertinentiis suis cultis et incultis, quesitis et inquirendis, quocumque iure vel nomine censeantur, Ita videlicet, vt Prelatus et Conuentus predicti cedente vel decedente Rectore seu Plebano ibidem vel Ecclesiam ipsam alio quouis modo libere vacantem plenam possessionem ipsius licite apprehendere valeant et tenere, Fructus eius ac redditus et Prouentus in vsus suos licite conuertendo. Prouiso tamen, quod perpetuum vicarium de gremio suo vel aliunde, si hoc eis magis competere videbitur, nobis vel successoribus nostris ad regimen dicte Ecclesie, quociens eam vacare contigerit, presentare debebunt, qui institutionem canonicam et Curam animarum Plebis subiecte de manibus nostris recipiat, cui etiam de prouentibus dicte Ecclesie tantum assignabunt, quod hospitalitatem debitam cum consueto numero Capellanorum seu ministrorum nec non iura Episcopalia et Procurationes Nuntiorum sedis apostolice seu Legatorum ipsius Metropolitani quoque et Ordinarii ac Archidyaconorum et Decanorum Moderata etiam subsidia apostolica, metropolitica, Dyocesana aut alia quauis auctoritate imposita vel imponenda ac quecumque alia onera vndecumque incumbentia de porcione sua comode possit supportare, Totum residuum vsibus suis et prefati sui monasterii ex hac gratuita nostra largicione integre applicando. Et vt hec nostra donatio, que ex intime deuotionis ac compassionis affectu processit, firma et inuiolata perpetuo ab omnibus obseruetur, Presentes super ea Litteras scribi fecimus nostri ac prelibati Capituli nostri Sigillorum appensione roboratas. Actum et Datum Patauie Anno domini Millesimo CCC°. Tricesimo quarto In festo Beatorum Petri et Pauli apostolorum.

Source Fulltext: OÖUB 6 (Wien 1972) Nr. 121, S. 129f.