Ich Hans von Weitra vnd ich Chunrat Stozzel Purger ze Chrems vnd ich Nycla zu derselben zeit Richter ze Mautaren veriechn offenbar an disem Brief vmb den chrieg, den Her Groff der Teuffenpekch gefu^eret vnd gehabt hat von des Gotzhauss wegen von Reichersperg gen Weicharten dem Mawrer vnd gen vron Agnesen seine Hausvrowen vnd iren paiden Erbn vmb daz Haus, daz da leit ze Chrems in dem dereich ze nast Reichersperger Hof mit sampt dem Ga^ertlein, daz darzu gehoret. Derselb Chrieg desselben Hauses ist redleich vnd ordentleich bericht vnd auzgetragen mit fu^er getanen beschaidenhait, daz der vorgenant Weichart oder sein Hausvrow oder ir Erben dem egenanten Gotshaus alle iar hinfurt ewichleichen von Haus vnd von Gartem raichen vnd dienen schulln in iren Hof ze Chrems ze rechtem Purchrecht aller jarrichleichen an sand merteintag Sechtzk pfenning, vnd an sand Jorgen Tag drey schilling wienner mvnz, di zv denselben Tagen gibich vnd ga^ebich sind. Vnd als offt daz vorgenant Haus verchaufft vnd vera^endert wierdet, so schulin dauon gevalln funfzehen ze anlait vnd funfzehn ze ablait wiener pfenning. Vnd da von, daz der offt gnant Weichart nicht aygens Insigel hat, da von hat er vns gepeten, daz wier zw einem gezeug dirr verschriebnen sache vnser Insigel an disen Brief gehangen habn. Der Prief ist gegeben an Sand Symons Tag, do man von Christes gepurdt zalt dreutzehn hundert jar darnach in dem acht vnd dreizkisten Jar.

Source Fulltext: OÖUB 6 (Wien 1972) Nr. 277, S. 280f.