Gotfridus dei gracia Ecclesie Patauiensis Episcopus Vniuersis, quorum interest vel intererit in futurum, salutem in domino sempiternam. Cum tales ad honores ecclesiasticos merito sint assumendi, qui legittime ad eosdem vocantur et quibus vite et morum honestas ac meritorum probitas suffragatur et qui Ecclesiis preesse et prodesse vtiliter presumantur, Monasterium igitur in Reichersperig Cononicorum Regularium nostre dyocesis per Prepositum soliti gubernari, per mortem recolende memorie, qui pro reformacione eiusdem Monasterii Rector et Gubernator eidem per Predecessorem nostrum in spiritualibus et temporalibus cum plenaria Prelati potestate fuerat deputatus, Decanus et Capitulum vocatis omnibus, qui debuerunt et voluerunt eleccioni futuri Prelati interesse, Die ad Eligendum prefixa virum religiosum et discretum Dyetmarum Canonicum ibidem in Prepositum suum per formam compromissi elegerunt, prout in Decreto super hoc confecto nobisque exhibito plenius apparebat, supplicantes nobis humiliter, vt eleccionem huiusmodi graciose confirmare dignaremur. Nos vero iuxta doctrinam Apostoli dicentis: Nimini cito manum imponas, nil preciptare volentes proclamacionem seu cridam in dicto Monasterio publice fieri fecimus, vt si quis esset, qui contra electum, electores seu eleccionis formam quidquam dicere vel proponere vellet, coram nobis Patauie in Curia nostra Episcopali peremptorie compareret proxima feria sexta ante festum Pentecostes eundem terminum Electo et electoribus assignantes, Verumque die eadem veniente nullus appositor comperauerit, Procuratoribus memorati Capituli coram nobis conparentibus et petentibus cum instancia eleccionem dictam confirmari Nosque decreto Electionis diligenter inspecto et cribrato, quia inuenimus predictam eleccionem canonice celebratam nullumque canonicum obsistere Electo memorato (impedimentum), sed pocius ipsum de prouidencia circumspecta plurimum conmendari, eandem Eleccionem de consilio peritorum inuocato dei nomine auctoritate ordinaria duximus confirmandam preficientes ipsum Electum eidem Monasterio in Prepositum et prelatum ipsique Monasterio prouidentes de eodem Curam animarum ac Jurisdicionem et administracionem spiritualium et temporalium eidem conmittentes. Quapropter vobis Decano et Capitulo prefatis ac omnibus aliis, quorum interest vel intererit in futurum, firmiter iniungimus et mandamus, quatenus eundem Prepositum vestrum benigne recipiatis et obedienciam tanquam Prelato vero faciatis sibique de singulis prouentibus, redditibus ac vniuersis pertinenciis eiusdem Monasterii vestri integre respondere facientes (sic) sicut penas Canonicas cupitis euitare. Datum et Actum Patauie quarto Nonas Junii Anno domini Millesimo Trecentesimo XLVIto.

Source Fulltext: OÖUB 6 (Wien 1972) Nr. 544, S. 551f.