Ich Hanns der Chrttmpekch vergich offenbar mit diesem brief allen lewten, das ich hau bestanden von dem erbern herrn Dietmaren, probst ze Reichersperg, vnd von dem Conuent daselbs irn zehent, den e malen hat inn gehabt Herman der Payer von des goczhaus genaden, mit allen den ern, rechten vnd nu^etzen als er geho^ert in den hof ze Praitenueld, der des goczhaws ledigs freys aigen ist, von liechtmess die schirst chumbt v^eber sechs jar also die sechs nu^etz mit der beschaiden, das ich dem vorgenanten probst oder wer des goczhaws ze Reichersperg gewaltiger ist, ob er nicht enwer, ierleich dauon geben sol ze flust vnd ze gwin zwaintzik phunt pfenning Wienner munzz, di dann gib vnd gäb sind, auf sand Yligen tag vnuertzogenleich gein Chrems mit meinem poten in der Liebhartjnn haws auf der prukk. Tet ich des nicht, wie getanen schaden si des na^emen an Christen oder an Juden, chlainen oder grozzen, den si gesprechen mugen vngesworn, an ayd vnd an recht, den sol ich in allen abtun vnd widerchern gar vnd gantz vnd sullen sy das haben datz meiner trewn vnd darzu auf aller meiner hab, di ich inndert han, wo die gelegen ist, ich sey lebentig oder tod. Vnd si mugen auch ir zehent fürbaz lazzen mit meinem gütleichem willen vnd gunst, wem si wellent vnd wem si verlust vnd sol ich auch dieselben, wem si ir zehent lassent, dartzu füdern vnd trewleich stewren vnd nindert hindern an aller stat, wo ich es vermag. Mich begagent auch der erbar herre herr Dietmar der obgenante probst ze Reichersperg vor seinem conuent vnd auch vor andern erbern lewten vmb ir chirchen ze Edlitz vnd vmb die widern daselbs die zu dem selben gotzhaws gehörent, daz in etwenn vnpilleichen vnd vngütleichen von der vogtai wegen geschehen wer; nu was ich ein new wirt vnd west sein nicht wol ze veranttwurtten vnd verhies daselben dem probst vnd dem conuent mit meinez trewn an geuer, ich wolt mich sein deuaren (!) mit den eltisten, wie die vogtai von ellter herchomen wer vnd schult dem gotzhaws darnach prief vnd guet vrchund geben nach meiner frewnd rat, also das ich die vorgeschrieben vogtay in meinem genedigem scherm haben sol vnd sullen auch von mir vnd von allen meinen nachkomen aller vnpilleichen anua^ell vnd beswernüzz, wie di genant sein, chlain oder gros fürbas entladen vnd v^eberhabt sein. Vnd des sind zeugen die erbern piderlewt, die pey der sach gewesen sind: herr Lienhart von Morspach, ze den zeiten phleger ze Obernperg, herr Chunrat von Swentt, Gotfrid der Talhaymer von Osternach, Hainrich der Eytzinger, purger ze Obernperg, Chunrad der Stroyher, Herman der Payer, Hainreich der Chunigsperger, Wulfing der Pulsinger, Heinreich der Pleintinger vnd ander erber pider läwt genug. Wer auch den brief mit irem willen innhat, der hat all di recht, die oben an dem brief verschriben stent. Vnd das in das also stet gantz vnd vnczebrochen beleib, gib ich in vorgenanter Hanns der Chrumpekch dem obgenanten herren Dietmaren probst /.e Reichersperg vnd dem conuent daselbs den gegenwurtigen brief versigelten mit meinem anhangunden insigel. darunnder sich mein hawsfraw vnd all vnser erben mit iren trewen sich verpindent, trewleich alles das stet ze haben, das an dem brief verschrieben stet. Der geben ist ze Reichersperg, do man zalt von Christes gepurd drewtzehen hundert jar darnach in dem acht vnd viertzkistem jar in der vasten.

Source Fulltext: OÖUB 7 (Wien 1876) Nr. 54, S. 50f.