Wier Dietmar von Gotes genaden probst und der convent ze Reichersperg an ainem tail und wier di chlosterfrawn und der convent dez frawnchlosters da selbs an dem anderm tail verjehen offenbar mit dem brief, daz wier ze paider seitt mit veraintem mu^et von dez erwierdigen fu^ersten unsers gena^edigen herren hern Albrechts pischofs ze Pazzaw willen und gescha^efcz wegen willichleich umb di stozz misshelung und zu^espru^ech von unserer egenanten chlosterfrawn pfrunt wegen und auch umb ander sachh ga^entzleich gegangen sein und gen hinder di erwierdigen herren hern Hansen von Scherfenberch tumprobst und hern Fridreichen probst datz sand Niclo ze Pazzaw also mit der beschaiden, waz si nach unserer paider chuntschaft und fu^ergab zwischen unserer paider tail ervinden und hin fu^er schikchen und orden, daz schüllen und verhaizzen wir paidenthalben sta^et ze haben an alle widerred, und waz si uns dar uber ze pen oder ze wandel setzen da verpinden wier u^ens hinder und nemen di auf uns umb alles daz sta^et ze haben ze volfüren daz si sprechent schaident oder ordent. Mit urchund dez briefs der besigelt ist mit unserm vorgenant Dyetmars und unsers conventz und auch unser der chlosterfrawn anhangunden insigeln, der geben ist do man zalt von Christes gepurt dreytzehen hundert jar und in dem vier und sibentzkistem jar an sand Laurentzentag.

Source Fulltext: OÖUB 8 (Wien 1883) Nr. 704, S. 716