Wir Dietmar von Gotes genaden probst ze Reychersperg und wir der convent daselbs wir verjehen, daz wir uns nach rat erberger la^ewt gantz und gar veraint und betaidingt haben mit dem edeln hern hern Reykkern dem Marspechen genant von Ru^edenberch und mit fraun Elzpeten hern Lyenhartz von Marspach sa^eligen witiben umb alle di zu^espru^ech di si hintz uns und unserm gotzhaus gehabt habent von der jartag wegen/e di der obenant herr her Lyenhart von Marspach hinder ym lazzen hat von im und seiner mueter saeligen und von seiner swester frawn Urseln von dem Turnn und von seins pru^eder to^echter frawn Chunigunden der Hadra^erinn, und des wir und unser convent auf ainem tail und der edel herr her Reykker der Marspach genant von Ru^edenberch und fraw Elzpet herrn Lyenhartz von Marspach saeligen witib auf dem andern tail slechtleich gegangen sein hinder erberger la^ewt und di slechtleich und nach iren trewn erfunden und gesprochen habent, daz wir di jarta^eg all alzo di oben benant sind ains tags und auch miteinander hegen schu^ellen an sand Pantaleons tag, daran der obenant herr her Lyenhart von Marspach saeliger verschaiden ist, ym seiner mueter seiner swester und seines pru^eder tochter alzo di oben benant sind, in und irn vorvodern und nachcho^emen ewichleich alleu jar begen dez nachtes mit igilij und dez morgens mit einer gesungen selmezz mit vollem chor und mit andern gesprochen messen alzo wir daz pest vermu^egen, und su^ellen auch dez selben tags alle jar ewichleich under arm la^ewt tailen ze prot ainschaff chorns und vier pachen und sol yeder pach eins halben pfuntz wienner wert sein, und sol auch dez selben tags alle jar ewichleich taylen under di hern dreu pfunt wienner pfenning und den frawn geben in daz frawn cholsler (sic) auch dez selben tags ewichleich ain halbs pfunt wienner pfenning dar umb di auch dez nachtes vigilij sullen haben. So schol dem mesna^er auch alle jar an dem jartag gevallen segtzehen pfenning daz der dester emssichleicher la^ewtt dez nachtes zu^e der vigilij und dez morgens zu^e der selmezz mit allen gloggen. Auch sol man alleu jar geben ewichleichgen Oesternach dem heyligen hern sand Veit zwai pfunt wienner pfenning, dar umb der pfarrer von O^ert datz sand Veit sol sprechen alle wochen zwo mess wann er dez di muezz mag gehaben. Auch sol man alle tag ain mess haben in unser frawn chappeln da der obverschriben hern grebnu^ezz vor ist, und welher herr da di mess hat dem sol man drey pfenning geben. Dann an dem samtztag so sol man di mess singen, und welher herr di mess dann singt dem sol man fu^enff pfenning geben und ain pfrunt weyns. Auch sol man alle montag ain selampt haben dacz sand Augustein in der gru^efft, und da sol man dem hern der di mess da hat drey pfenning geben. Auch sol in der obenanten chappeln datz unser frawn prinnen ein ewygs Iiecht nacht und tag von oel, und davon schu^ellen dem guster gevallen alle jar ja^erleich zwayntzichk schilling wienner pfenning. Auch hat der edel herr her Haug von Marspach und sein sun her Hainrich van Murspach den Got genad zwen bestifft ewig jarta^eg di man in auch ewichleich alle jar begen schol nach der brief sag di ir erben darumb von unserm gotzhaus habent, und darumb wir pilleich ir und irer vodern und nachomen gedenchen schu^ellen wan si dez gotzhaus di andern stiffter gewesen sind; und darumb durch hail irer und irer vorvodern und nachomen sel habent si uns und unserm gotzhaus ledichleich ingeantwurt aus irer nu^eczz und gewer in unser nuczz und gewer zwen ho^eff ze Hybing und ain hueb da selbs und di fyschwaid daselbs und zway guet datz Pomansperg, und ain besonder holtz das gehaissen ist daz ho^ech Pu^echa^ech gelegen an dem Aychperg mit allen den ern rechten und auch nu^eczzen di darzu^e geho^ernt, und schu^ellen si noch ir nachomen noch chain ir erben noch niempt von iren wegen chain ansprach hintz uns noch hintz dem gotzhaus nimmer mer gehaben. Wa^er aber daz der obverschriben jartag geviel an einen hochzeitleichen tag und daz man den daran nicht begen mo^echt, so sol man in all zeit an dem na^egsten tag hin nach begen oder in der selben wochen an ainem tag da man daz wol an getu^en mag, mit vigilij mit selmess mit taylung und mit alleu deu alzo oben verschriben und beru^ert ist. War aber daz wir sa^eumich dar inn wa^ern und daz wir den jartag alzo nicht begen wolten alz oben verschriben ist, so mu^egen sich ir na^egst freunt oder ir erben dez geltz daz wir daz selb jar under uns tailen solten underziehen und den jartag damit begen daz selb jar pey welhem chloster si wellent. Und dez zue einer ewigen geda^echtnu^ezz und zeugnu^ezz geb wir in den brief mit unserm und unsers conventz anhangunden insigeln, dar under wir uns verpinten allez daz ze volfuern daz oben geschriben stet. Daz geschach an sand Oetmars tag nach Christi gebu^erd dreutzehen hundert jar darnach in dem ffu^enff und sybentzgistem jar.

Source Fulltext: OÖUB 8 (Wien 1883) Nr. 760, S. 785ff.