Ich Vlreich der Chern von Lynt, mein hausfraw vnd all vnser Erben wir veriehen offenbar mit dem brief allen la^ewten, daz wir mit vnser lieben pru^eder Hainreichs vnd auch Wernharcz der Chern willen vnd auch gunst recht vnd auch redleich versetzt haben vnser wys datz Lynt di da haist di Mitter wis dem langen Fridreichen gesessen ze Ra^et (sic), seiner hausfrawn vnd allen irn Erben vmb segs pfunt wienner pfening di si vns berait vnd an rechtn noeten darauf gelyhen habent. Wir haben in auch di obenanten wys in satzz weis geantwurt aus vnser nutzz vnd gewer in ir nutzz vnd gewer mit vnsers gna^edigen Hern hant hern Ortolffs von Waldekk vnd sein auch des satzz ir gewer vnd furstand an aller stat vnd in dez not geschiecht alzo des landes recht ist. Wär aber ob si icht chriegs von dez satzz wegen an gyeng vnd dez si schaden naemen, wi der schad genant wa^er, den ir ains pey sein trewn gesprechen mo^echtn an alz recht den selben chrieg vnd schaden allen su^ellen vnd wellen wir in ga^entzleich ausrichten vnd widerchern vnd sullen si daz haben auf vns vnd vnsern trevn vnd darzue auf aller vnser hab wo wir di haben oder lassen si sey besucht oder vnbesucht vnd sullen si dar vmb allev irew recht wi^e di genant sind gen vns vnd aller vnser hab erlangt vnd behabt haben vnd wir gen in verlorn. Vnd daz in oder wer den brief mit irem willen inn hat vnd vns dar mit ermont, daz alzo stät beleib, geben wir in den brief mit dez Erbern Petern dez Tu^emair insigel der daz durch vnser fleizigen pet willen an den brief gehangen hat im vnd sein Erben an allen schaden, dar vnder wir vns vnd all vnser Erben verpinten mit vnsern trevn an geva^er alz daz staet ze haben daz vorgeschriben stet. Wir haben auch losung alleu jar vor sand Go^ergen tag in den acht tagen oder hin nach in den acht tagen vmb di obuerschriben segs pfunt wienner pfening di dann gib vnd ga^eb sind an allen abslach. Daz geschach an sand Gorgen abent nach Christi gepurd drevtzehen hundert jar dar nach in dem acht vnd Sybentzgistem Jar.

Source Fulltext: OÖUB 9 (Wien 1906) S. 426-427