Ich Fridreich der Hochenwartter die zeit richter ze Scherding bechenn offenleich mit dem brief und tun kund allen den, die in an sehent hörnt oder lesent, daz für mich cham in offnew schrann, da ich saz an dem rechten zw Scherding, der erwirdig geistleich herr her Greyff probst zue Reichersperig mit vorsprechen und sprach, das er und sein gotzhaws hieten ein aygen ze Hibing bei der Antesen und da selben hiet er und seins gotzhauzz arm läwt ein besuch und gemachprukk gehabt, die hiet in ein güzz und ein übrigs wazzer hingetragen und geflötzt. Nu wärn sein arm läwt zu ym chomen und hieten ym gechlagt, sy möchten ir notdurfft nicht wol besuchen ze veld, als ir notdurfft war. Dez cham der egenant probst ze Reichersperig in das ehafft tayding ze Hytting und öffent sein und seins gotshawzz recht, als dez lantz recht ist, da sagt im das recht, er möcht im und seins gotzhawzz arm läwten wol ein prukk machen oder nicht machen, seind die Antesen chain esteg noch eprukk nicht enhiet, möcht er das geweisen. Alzo cham er in die lant schrann ze Scherding und hat geweist mit erbern pidern läwten, alz der schrann recht ist, daz es nicht ein eprukk ist und nur ein besuch und gemachprukk im und seins gotzhawz läwten und mugen auch die gemachen oder nicht gemachen geslahen oder nicht geslahen, wy si das tunt oder lazzent, dez sol er und sein gotzhawz und all seins gotzhaus läwt gein der herrschafft und allen amtläwten ungolten und an schaden beleiben. Alzo sagt frag volg urtail und das recht, man solt sey beruffen vor dem recht zue furban und dez solt man dem vorgenanten probst und seinem gotzhaws geben ein gericht brief, ob er sein begert, den gib ich im von gerichtz wegen, als er im desselben tags an dem rechten ertailt ist worden, versigelt under meinem anhangundem insigel. Dez sind zeugen di erbern herrn ritter und chnecht, di bey dem rechten gewesen sind, her Peter der Chamerawer zum Haytzstain phleger zu Scherding, her Pernhart der Hadrer, Eysenreich Dreflinger, Thoman Schreiber dizeit phleger zu Julbach, Hiltprant und Peter di Raspen, Ulreich der Ottenperger, Hainreich der Tewffenpekch, Andre von Altenöting und ander erber lawt genug. Geben dez Mitichen vor sand Marie Magdalentag nach Christi gepurd drewczehen hundert iar und in dem siben und achczkistem iar.

Source Fulltext: OÖUB 10 (Wien 1933) S. 442-443