Ich Nycla der Wenndelstain dy czeit pfleger und richter zu Schärding bechenn offenbar mit dem brief, daz für mich cham zu Schärding, da ich saz an offner schrann an dem rechten, der wirdig herr her Greyff probst zu Reichersperg mit vorsprechen und sprach, das er und sein gotzhaws ein Mesenlehen hieten zu Ort, darumb wäär Weygel Messenpekch vormaln mit im ze chrieg worden und auch zu recht chomen, daz war ettwivil mit lengumb und tadingen her chomen untz auf den hewtigen tag. Da cham Weigel Messenpek für mich mit erbern läwten mit antwurt und begab den vorgenanten hern den probst zu Reichersperg und sein gotzhaws dez rechten von dez egenanten Mesenlehen wegen zu Ort und sprach, er wolt fürbaz und sein eriben nichcz mer darauf ze sprechen haben. Nw fragt ich, waz recht wär; da sagt frag volg vrtail und daz recht, seind der Messenpekch den vorgenanten herrn zu Reichersperg und sein gotzhaws dez rechten begeben hiet von dez Mesenlehen wegen, so schult der offtgenante herr der probst zu Reichersperg und sein goczhaws dez obgenanten Mesenlehen zu Ort mit allem zugehorn, alz ez von alter herchomen wär, mit ruen bey nucz und gwer beleiben, und soll hewt und fürbaz vor dem obgenanten Messpekchen und seinen eriben an zuspruch mit run sein und sullt auch seinen frum damit schaffen alz mit anderm seins gotzhaws aigen und dez solt ich im und seinem gotzhaws einen gerichtzbrief geben und darczu der herschafft ru und scherm, daz sich also vor mir vergangen hab, mit rechtem redleichem recht. Dez gib ich im und seinem gotzhaws den brief von gerichtz wegen, als er im mit dem recht ertailt ist worden under meinem aigen anhangundem insigel, dez sind czewgen dy erbern vestt ritter her Christan der Ramstorffer dy czeit pfleger am Newnhaws gegen Schärding über, her Lienhart der Swenttner, Eysenreich Dreflinger, Peter Rampelczhaimer, Herman von Holcz dy czeit pfleger zu Einberkch, Ortolf Gamred Lewtold und Lienhart geprüder dy Schachner, Hainrich Tewffenpekch, Wernhart Sprüchel der Vorsprech und ander erber läwt genug, dy dez tags an dem rechten gesessen sind. Daz ist geschehen dez Mitichen am Aschtag, do man zalt von Christs gepurd drewczehenhundert iar und darnach in dem newnczkistem jar.

Source Fulltext: OÖUB 10 (Wien 1933) S. 603-604