Ich Jacob der Reindel vnd ich Ann sein hawsfraw, verichen offenbar mit dem brief allen läwten, daz wir geworben haben von dem erwirdigen herren hern Greyffen probst zu Reichersperg von dem conuent vnd dem gotzhaws daselbs ir gut ze Pankchaim, daz ir freys aygen ist, zu vnserer vorgenanten zwain lehen vnser lebtag vnd nicht lenger, also mit der beschaiden, daz wir ez stiftleich vnd pawleich inn haben vnd häwsleich legen vnd mit vnser selbers leib hableich besitzen sullen vnd sullen auch in vnd irm goczhaws järleich dauon dienen vnd raichen vnuerczogenlich zu sand Jacobstag sechczk pfenning wienner münzz vnd sechs chäs, daz yeder chäs sechs pfenning wol wert sey, vnd dreyzzig ayr. Wir sullen auch in ir stiffttaiding komen, wann vns darin gepoten wiert, alz ander ir holden mit zwain huenern vnd mit vier trinkchpfenning vnd an schaden dar aus. Täten wir aber dez nicht, vnd waz an dem brief verschriben stet, so habent si vollen gewalt, vns darumb ze pfenten auf dem egenanten irem gut mit vnserm gutleichen willen. Würd aber in pfanttung verstanden vnd gewert, so haben wir alle vnser recht verloren, di wir haben auf dem vorgenantem irm gut gancz vnd gar vnd sind in und irm goczhaws dann hin wider veruallen in ir gewalt an alle widerred. Si habent auch alle di recht hincz vns, di si habent hincz andern irn behawsten holden; darumb sullen si vns versprechen mit den rechten, alz verr si vermögen alz ander ir behaust holden. Wir sullen vns auch mit dem vorgenanten gut nyndert anherren noch anderswohin dhainerlaj rechten suchen nur zu in vnd irm goczhaws an geuär vnd sullen auch dem obgenanten irm gut nichz encziehen smelen noch auswechseln noch dhainerlai hindan tailen noch enpfrömden in dhainer weis. Auch sullen noch mögen wir vnsrew recht auf dem vorgenanten gut weder verseczen noch verchauffen noch in dhainerlai weis verchumern nur mit irr hant vnd gunst vnd mit irm gutleichem willen vnd wizzen. Vnd wann wir di obgenanten zwen leib nicht mer sein vnd abgen mit dem tod, so ist in vnd irm goczhaws daz egenante gut mit aller zugehörung ledig vnd los worden an allen krieg mit alle dew vnd ez dann erfunden wirt vnd hat auch dann dhainer vnsrer erben noch frewnt nichcz darauf ze sprechen noch ze vodern weder wenig noch vil in dhainer weis. Mit vrchund dez briefs, den wir in vnd irm goczhaws darüber geben, besigelten mit dez erbern vnd beschaiden Wernharcz dez Lewpprechtinger anhangunden insigl, daz er durch vnser fleizzig pet willen an den brief gehangen hat im vnd seinen eriben an schaden. Darunder wir vns verpinden mit vnsern trewn stät ze haben, daz an dem brief verschrieben stet. Geben an sand Jörgentag nach Kristz gepurd drewczehenhundert iar vnd in dem ainem vnd newnczkistem iar.

Source Fulltext: OÖUB 11 (Wien 1983) S. 25-26