Wir Greiff von Gots genaden probst zu Reichersperg und der convent gemainchlich daselbs veriehen öffentlich mit dem brief allen leuten, daz wir mit gemainem rat unser gut ze Aw und waz darzu gehört gelegen bey Mawrnperg in Althaimer pfarr, daz unser freys aigen ist, lazzen haben zu leibgeding Wernharten von Weygreting Annen seiner hawsfrawn und Hannsen und Ulreichen ir paider sun also zu irn vier leiben ir lebtag und nicht lenger in der beschaiden, daz si ez an aller stat stiftleich und pauleich legen und inn haben und mit ir selbers leib wesendlich besiezen sullen und sullen uns dem probst und unserm gotzhaus ierlich davon dienen und geben unverczogenlich an sand Görgentag drey schilling wienner pfenning und ze Pfingsten sechs chäs, der yeglicher vier pfenning wol wert sey, und dreizzk ayr und sullen auch all iar in unser stiffttaiding chomen, wann in darin geboten wirt, alz ander unser holden mit zwain huenern und an schaden daraus. Si sullen auch uns dem convent in unser oblay auch all ierlich, wie ez beiärt, davon dienen und geben drey schilling pfenning wienner münzz auch an sand Görigentag an verczichen. Wir haben auch alle die recht hincz in, di wir haben hincz andern unsern behausten holden; darumb sullen wir sew versprechen mit dem rechten alz ander unser behawst holden, alz verr wir vermögen. Si sullen auch dem vorgenantem vnserm gut nichcz entziehen smeln noch auswechseln noch dhainerlai hindan tailen noch verhandeln noch sich damit nyndert anderswo anhern nur zu uns und unserm gotzhaus angevär. Auch sullen noch mögen si irew recht weder versetzen noch verchauffen noch in dhainerlai weis verchumern, nur vor uns mit unserer hant und gütleichem willen. Versäzzen oder überfürn si aber dhainerlai, daz an dem brief verschriben stet, so habent si alle irew recht an dem vorgenanten gut verlorn gar und ganz an alle widerred. Und wann auch di obgenant vier leib nicht mer sind und abgent mit dem tod, so ist uns und unserm gotzhaws daz vorgenante gut ze Aw mit allem zugehörn ledig und loz worden und mit alle dew und ez dann erfunden wirt nichcz ausgenomen. Daz in und uns daz also stät und unczebrochen beleibe, geben wir in den brief besigelten mit unsern anhangunden insigeln, geben an sand Veitztag nach Christz gepurd drewczehen hundert iar, darnach in dem vier und newnczkistem iar.

Source Fulltext: OÖUB 11 (Wien 1983) S. 295-297