Ich Thoman und ich Jörig geprüder aus dem Vczental vnd ich Hanns der Purger vnd ich Gorig sein sun doselbs im Vczental verichen offenlich mit dem brief allen leuten, das wir geworben haben von dem erwirdigen herrn probst Greiffen zue Reichersperig vnd von dem conuent daselbs ir vnd irs goczhaus gut genant auf dem Pühel im Vczental gelegen in Rieder gerichtt vnd in Gurttner pfarr, daz ir freys aigen ist, zu leibgeding also zu vnsern obgenanten vier leibern vnser lebtag vnd nicht lenger in der beschaiden, das si das egenant vnser gut an aller stät stiftlich vnd pawlich innhaben vnd legen vnd häwsleich besiczen sullen vnd jerlich, wie es beiärt, vns vnd vnserm goczhaus dauon dienen vnd raichen sullen ze Ostern vier chäs, daz yeder chäs sechs phenning wol wert sey, und sullen auch in vnser stifttaiding chomen, wann in darin gepoten wirt alz andern vnsern holden, mit vier hünern vnd an schaden daraus. Auch haben wir alle die recht hincz vns, die wier haben hincz andern vnsern behawsten holden. Darumb sullen wir sew versprechen mit den rechten alz ander vnser behausten holden vnd sullen si sich mit dem obgenanten gut nyndert anders wohin anherren noch dhain versprecher oder rechten suchen nur zu vns vnd vnserm goczhaus an gewer. Si sullen auch dem vorgenanten vnserm gut nichcz entziehen smelen noch auswechseln noch dhainerlay hindan verhandeln noch emphrömden in dhainer weis. Auch sullen noch mögen si irew recht weder verseczen noch verchauffen noch in dhainerlay weis verchumern nur vor vns mit vnser hant willen vnd wissen. Versäzzen oder vberfirn sy aber dhainerlay, das an dem brief verschriben stet, so habent sy alle irew recht, di si habent auf dem obgenanten gut verlorn gor vnd gancz vnd sind vns dann herwider veruallen in vnser gewalt an alle widerred. Vnd wann auch die obgenanten vier leib nicht mer sind vnd abgent mit dem tod, so ist vns vnd vnserm goczhaus das vorgenant gut im Vczental vnd waz darzu gehört nichcz ausgenommen ledig vnd loz worden an allen krieg vnd anspruch, wie man ez dann vindt ze haus ze hof ze holcz vnd ze velden vnd hat dann dhainer ir erben freunt noch nachkomen noch von irn wegen darauf ze sprechen in dhainer weis.Mit vrchund dez briefs, den wir in vnd irm goczhaus darüber geben besigelten mit der erbern vnd beschaiden Vlreichs dez Apfentaler vnd Hansen des Mülhaimer von Lueg anhangunden insigeln, di si durch vnser fleizzig pet willen der sach zu einer gedechtnusse an den brief gehangen habent in vnd iren erben an schaden, darunder wir vns verpinden mit vnsern trewn, als wir oben berurt sein, trewlich stat ze haben, das an dem brief verschriben stet. Geben nach Christi gepurd dreuczehen hundert jar darnach in dem sechsvndnewnczkistem iar an sant Philipps vnd sant Jacobstag der heiligen zwelifpoten.

Source Fulltext: OÖUB 11 (Wien 1983) S. 502-503