In nomine Domini amen. Anno nativitatis eiusdem millesimo quadringentesimo secundo, indiccione decima, die vero quartadecima mensis Marcii, hora vesperorum vel quasi, pontificatus sanctissimi in Christo patris et domini nostri, domini Bonifacii divina providencia pape noni, anno tredecimo, in curia dotis ecclesie Prampergensis, Salzburgensis diocesis, in cenaculo maiori eiusdem domus, in mei, notarii publici, testiumque presencia subscriptorum constitutus personaliter discretus vir dominus Andreas dictus Raydel, protunc rector perpetue vicarie beate virginis Marie in Múnichkirchen dicte diocesis, protunc faciens commutacionem eiusdem ecclesie sue in Múnichkirchen cum discreto viro domino Hartmanno, tunc rectore ecclesie in Pernekk eiusdem diocesis, pro eadem ecclesia in Pernekk non compulsus nec coactus, sed sponte et libere fassus est ac palam et publice coram cunctis ibidem astantibus recognovit se quasdam certas decimas in dicta parrochia sua Múnichk(irchen) iacentes et existentes, omnes et singulas tam maiores quam minores, ad monasterium venerabilium virorum dominorum .. prepositi et conventus in Reichersperg ordinis canonicorum regularium sancti Augustini Pat(auiensis) diocesis tituli veri iuris perpetuis temporibus totaliter et indivise spectantes et pertinentes, prout et nunc spectant et pertinent, a venerabili patre domino Griffone, protunc eiusdem monasterii preposito, pro quibusdam pecuniis ad certos annos iam elapsos convenisse et appreciatum fuisse et hocusque tempus easdem decimas solum ex gracia et favore dicti domini prepositi per convencionem et appreciacionem predictas tenuisse ac possedisse, prout ipse et alie persone ipsum precendentes predictas decimas ab ipso domino preposito et predecessoribus suis convenire et appreciare poterant et valebant; ibidemque etiam dictus dominus Andreas Raydel ipsas decimas omnes et singulas, prout tenuit et possedit per convencionem, ut predictum est, in manus dicti domini Griffonis prepositi ibidem etiam personaliter astantis plene et in toto, nichil ibidem doli vel alicuius fraudis immiscens, restituit et resignavit. Qui dominus prepositus antedictus ipsas decimas sic, ut premittitur, per ipsum dominum Andream restitutas et resignatas ad se et ad monasterium suum sepedictum recepit et reassumpsit et peciit sibi per me, notarium publicum infrascriptum, super resignacione huiusmodi et aliis omnibus et singulis supradictis unum vel plura publicum seu publica confici instrumenta. Acta sunt hec anno, indiccione, die, mense, hora, pontificatus et loco, quibus supra, presentibus honorabilibus et discretis viris dominis Georio protunc plebano in Edlicz, canonico et professo dicti monasterii in Reichersperg, Hartmanno tunc rectore ecclesie in Pernekk supradicto, Michahele protunc socio in Pramperg presbiteris, Johanne de Abtstorf clerico, Wulfingo dicto Nósslér tunc castellano in Ternberg, Iohanne dicto Smydel, Petro Widmér, Lienhardo Mawrer laicis Salzburgensis et Patauiensis diocesum et pluribus aliis testibus ad premissa vocatis specialiter et vocatis. (S.) Et ego Georius Zaler de Fformbach clericus Patauiensis diocesis, publicus auctoritate imperiali notarius, fassioni recognicioni, resignacioni et reassumpcioni omnibusque aliis et singulis premissis, dum sic, ut premittitur, agerentur et fierent, una cum prenotatis testibus presens interfui ea, que sic fieri vidi et audivi. Ideo hoc presens publicum instrumentum exinde confeci et in hanc publicam formam redegi signoque et nomine meis solitis et consuetis signavi in fidem et testimonium omnium premissorum rogatus et requisitus,