Ich Vtz der Schaffer von der freinstat vnd mein Hausfraw Katrey vnd Vtz mein Sun vnd all vnser Erben veriehen offenbar an disem brief vnd tun chunt allen den, die in ansehent oder ho^ernt lesen, daz wier verehauft haben dem Erbern Ritter Ortwein von waltpu°rch vnd seinen Erben vnsern Hof datz Ra^enna vnd ein Mu^el, die do bey leit, vnd ein Hu^eb ze O^etzeinsdorf mit alle deu vnd darzu geho^ert ze holtzz vnd ze veld, versu°cht vnd vnuersu°cht vmb Sibentzig phunt phenning wienner mu°nzz, der wier redleich vnd recht verrieht vnd gewert sein mit einer guten gewissen vnd schu^ellen wir der vorgenanten Gu°t sein vnd seiner Erben gewer sein ze hof vnd ze tayding oder swo in sein not geschiecht. Vnd ta^et wier dez nicht, na^em er oder sein erben dhainen schaden, den schu^ellen wier in auzrichten vnd ablegen vnd schu^ellen daz haben auf vnsern trewen vnd auf aller der hab, die wier haben. Daz die red staet vnd vnuerchert beleib, dar vber gieb ich v^etz der schaffer disen offen brief ze einem v^erchu^end mit meinem anhangunden Insigel vnd mit wolfhartz Insigel dez Grillen, der ze den zeiten Lantrichter waz in der Riedmarich. Der brief ist geben in der Vreinstat Nach Christi gepu°rde Tausent iar, dreuhundert jar, darnach in dem zwaintzkisten iar an sand Cholmans tag.

Source Fulltext: OÖUB 5 (Wien 1868) S. 273, Nr. 282