ICH Ulrich Mitterberger vnd all mein erben veriechenn vnnd thuenn khundt, dass wier durch Gott zuvordrist vnnd meiner lieben Schwester willen Ver Anna der Mitterbergerin Closterfrauen zu Bulgarn gegebenn vnnd georndt habenn vnnsers rechtenn freyen erbthaills ain guett, ist gelegenn zw Greimhartzdorff bey Tienn-dorff ennhalb Walthausen vnnd diennt alle iahr järlichenn ann vnnser frauenn tag zu der diennstzeit ain pfundt wienner pfening vnd vier pfening vnnd ist frey ann alle steur vnnd ist freis aygen, mit allem dem, vnnd dartzue gehört versuecht vnd vnuersuecht, dem ehrwüerdtigen frauenCloster zu Bulgarn den frauen vnnd den herrn daselbs des heilligen Geists Ordtenn also mit aufgenombner rede, dass der vorgenanndt diennst von dem ehegenandten guett ebigclich geuallen vnnd gehoren soll zu ainem ebigen liecht, es sey mit jnnslett oder mit öll, vnnd das liecht solle prynnen jnn der vorgenanten frauen schlaffhauss des nachts alle nacht, wan sich di nacht anhebt, vntzt aber an den Tag, es soll auch von dem vorgenanndten gellt alle nacht die mötten beleucht werdten mit ainem guetten inssletliecht also, das die vorgenanten klosterfrauen dabey woll mötten gelesen mügen, vnnd soll auch der vorgenanten zwayer liecht jedweders nicht lennger oder anders prynnen, dan oben jnn dem brieff verschrieben ist, vnd das alle die redt vnnd alles, das oben jnn dem brieff geschrieben stet, vnnd recht, alss ichs gemaint vnd geordnet hab, also stätt vnnd vnzerbrochen bleibe vnnd zu ainer bessern sicherhaitt darüber so gib ich vorgenannter Vlrich Mitterberger vnnd all meine erben den brieff versigelt mit meinem anhanngundten innsigel vnnd mit der erbaren meiner guetten freundt insigeln Sighartz des Prewslein vnd Chunrats des Hahenspeckhen annhangundten jnsigell. Der brieff ist gebenn, da man zalt nach Christy gebuerdt drey (zehen) hundert jahr vnnd darnach jnn dem syben vnnd viert-zigsten jahre zu vnnser Frauen tag jnn der fasten.

Source Fulltext: OÖUB 7 (Wien 1876) S. 10f., Nr. 11