Wir u^elreich von Gotz gnaden probat ze sand Po^elten und wir Weygant von Gotz gnaden probst ze sand Flo^erian und bayd convent der selben gotzhawser vergehen und tu^en chunt offenleich mit dem brief umb alle di chrieg und sto^ezz di zwischen uns an ainem tail und zwischen dez erbern geistleichen herren hern Chu^enratz abt ze Tegernse und seines conventz dez selben gotzhaws an dem andern tail gewesen sind untz auf disen hew^etigen tag von dez weinzehentz wegen auf irn weinga^erten gelegen in der Wochawe, daz wir derselben chrieg und sto^ezz mu^etwillichleichen und mitgu^etleichen willen gegangen sein hinder den erwirdigen geistleichen herren hern Ulreichen den abt von dem Cho^etweig also, swaz der von sein trewen daru^eber sprech minn oder recht, daz wir daz allez gentzleich stet haben wellen und su^ellen an allen chrieg und irsal. Nu hat er gesprochen, daz si ir zwo pew^ent, di obern und di nidern gelegen in der Wochawe bey Anger, di do sto^ezzent an den nydern weg an ainem tail und an den mitterweg an dem andern tail neben unser obgenanten Ulreichs probst und dez conventz ze sand Po^elten weinga^erten und di auch gelegen sind hinder irm hof ze Jeu^eching, furbaz ewichleich ledig und vrey haben su^ellen vor allem zehent, si paw^en di selber mit irn phenning si verchau^effens oder swem se di lazzent. Er hat auch gesprochen, daz si uns fu^erbaz ewichleich von irn zwain weinga^erten gelegen ze Anger di an ir obgenanten zwo pew^ent sto^ezzent und auch von allen irn weingarten gelegen in der Wochawe swie di genant sind, rechtleich zehent geben su^ellen, si oder wer diselben weingerten von irn wegen inn hat an alle widerred. Wir sullen in auch di gegenburtigen sach besteten mit unsern und auch unserer convent anhangunden insigeln und sullen di raichen datz sand Flo^erian auf sand Merteins tag der nu schirst chu^emt, und auch uns daz bestetn mit irn anhangunden insigeln und uns di hintz sand Florian raihen su^ellen. Daru^eber geben wir in disen brief versigelt mit unserm obgenanten Ulreichs insigel probst ze sand Pölten. Datum et actum proxima die sabbati post exaltacionem sancte crucis anno domini Millesimo CCC/mo Lx. primo.

Source Fulltext: OÖUB 8 (Wien 1883) S. 44f., Nr. 41