Ich Chalhoch von Zirknarn und Anna sein hawsfraw und mit uns all unser erben wir vergehen, daz wir verchauffet haben unsern zehent der hernach geschriben stet, auf sechs leben dacz Reyffendorf und auf zwain lehen am hof dopey gelegen in Ryeder pfarr unserm genedigen herren probst Weyganten und dem gotshaws dacz sand Florian umb vier und sechczik phunt wyenner phenniug der wir gancz und gar gewert sein und gericht ze rechten taegen, den wir auch vo^er von dem obgenanten gotshaws ze lehen haben gehabt ze zins umb funfczehen phenning. Wer auch daz, daz yemant ellter brief herfu^er praecht umb di obgenanten acht zehenthaw^eser, wellen wir daz diselben brief to^ed und ab sein und fu^erbaz nyemant ze schaden chomen su^ellen. Daz dem offtgenanten probst und dem gotshaws datz sand Florian di red und di wandlung von mir obgenanten Chalhachen von Zirknarn von meiner hawsfrawn und allen unsern erben also staet und uuczebrochen beleyb, daruber gib ich in den offen brief versigelten mit meinem anhangundem insigel, und ze einer pezzern zewgnuzz mit Seybots von Nevnhoven und Seybots des Sweinpekchen anhangunden insigeln und mit Ulreichs des Lawn anhangunden insigel, der der wandlung zeug ist mit seinem insigel im an schaden. Der prief ist geben do man zalt von Christi gepu^erd drewtzehen hundert jar darnach in dem ains und sechtzikisten jar an aller heyling tag.

Source Fulltext: OÖUB 8 (Wien 1883) S. 48f., Nr. 46