Wier Rudolff der vierd von Gotes gnaden ertzhertzog ze O^esterreich ze Steyr ze Kernden herr ze Krain auf der Marich und ze Porttnawe graf ze Habspurg ze Tyrol ze Phiert und ze Kyburg marichgraf ze Purgow und lantgraf in Elsazz bechennen und tu^on chunt, daz wier haben angesehen geistleiche zucht und go^etliche lieb der erbern leut unserr lieben andechtigen probst Weygandes von sand Florian und der korherren daselbs und haben in dadurch und darumb daz si dester fleizzichleicher aller unserr vordern in ierem pet gedenchen und umb unser unserr lieben hertzoginn unser pru^eder und unserr erben seld und hail dest entzichlicher hintz Got bitten, die gnad getan und tu^on ouch mit disem brief, swenn si und ier gotzhaws ein haws in der stat ze Ens chouffent oder gewinnent, daz dann si und ier nachkomen ewichlich darinn frey und ledig sein vor aller purgerstewr schatzstewr ungelt wacht und aller anderr vordrung und ansu^echung wie di genant ist also, daz si von dem egenanten haws das si chouffent oder gewinnent, nichtz nicht leiden sullen mit der stag (sic) und mit den purgern ze Ens weder von der stat wegen noch von ier selbs wegen. Und wer ier wiert darinnen ist, den sullen die purger noch jeman ander umb derselben klosterherren geschefft wider die vorgenanten freyung nichtz besweren an geverd. Hiet aber derselb wiert von sein selbs wegen dhain arbait oder wandel, davon sol er mit der stat leiden als dann pillich und recht ist nach der vorgenanten unserr stat recht. Und des ze urchund gehen wier disen brief besigelt mit unserm grozzen fu^erstlichen insigel. der geben ist ze Wienn an freytag nach sand Urbans tag nach Kristes gepu^erd drewtzehenhundert jar darnach in dem drew und sechtzigisten jare unsers alters in dem vier und zwaintzigistem und unsers gewaltes in dem fumften jare.||
+ Wir der vorgenant herzog Ruodolf sterken disen prief mit dirr underschrift unser selbs hant.+

Source Fulltext: OÖUB 8 (Wien 1883) S. 136f., Nr. 131