Ich pru^eder Niclas von Wildungsmaur zden zeiten maister ze Maurperg ich Jans von Pergow^e zden zeiten pharrer ze La ich Niclas der Lo^echer zden zeiten official ze Wienn und ich Pernolt der Chlingenfurter wir vergehen, daz die erwirdigen und geistleichen her Ulreich probst ze sand Po^elten und her Weygant probst ze sant Florian und paid convent gemainchleich derselben goczhaewser an ainem tail, pru^eder Johan von Rumppenhaim lantcomiteur pru^eder Gilig hauscomiteur und die pru^eder gemain in dem Dewtschen haws ze Wienn an dem andern tail hinder uns gegangen sind aller chrieg und sto^ezz die zwischen in gewesen sind von des zehents wegen auf newn weinga^erten gelegen in der Wochaw^e, die dieselben herren dacz dem Dewtschen haws ze Wienne habent und die lew^et die si von in gehabt habent also, was wir daru^eber sprechen mit der minne und mit dem rechten, das si das genczleich stet haben sullen nach sag irr brief die si uns daru^eber gegeben habent. Nu haben wir alle vier erchant, das der zehent der vorgenanten weinga^erten rechtleich der obgenanten goczhewser dacz sand Po^elten und dacz sand Florian ist. Aber durich frid und niderlegung der vorgenanten krieg haben wir gesprochen mit minn und nach dem rechten umb die new^en phunt wienner phenning geltes minner siben und zwainczig phenning gelegen in der Wochaw^e auf den egenanten newn weinga^erten und auf ettlichen behousten gu^etern die die egenanten Dewtschen herren daselbens habent als es ze ainczigen hernach benant ist: des ersten auf Albrechts des Vogels haws und halben lehen zwelif schilling geltes, auf des Praschen haus und halben lehen und ouf seinem weingarten genant der Wirsnich drew phunt gelts, auf Stephans des Wolfrewtter weingarten new^en schilling gelts, auf Fridreichs des Rigler weingarten siben schilling geltes auf Hainreichs des Purchstaler anderthalben lehen weinga^erten achczehen schilling geltes, auf Chunrats des Pekchen haws drei und dreizzig phenning geltes also, daz sie die gu^elt auf den vorgeschriben gu^etern ze chouffen geben sullen den egenanten goczshew^esern dacz sant Po^elten und dacz sant Florian umb newn und sechczig phunt wienner pbenning, und sullen in daru^eber ainen chaufbrief nach des landes recht ze O^esterreich zwischen hinne und unser vrown tag ze der liechtmesse der nu schierist chu^emt, und sullen si in hinwider gu^et machen mit iren briefen in derselben zeit die egenanten new^en und sechczig phunt phenning ze geben auf sant Jo^ergen tag unverczogenleich. Wir sprechen ouch umb die hofstat gelegen ze Wesendorf in der Wochaw^e die der Amsteter die zeit innhat und der zehen phenning da von dient, daz derselb Amsteter von allen weinga^erten und aekchern, die zu^e derselben hofstat geho^erent und von alle dem erb das derselb Amsteter oder wer dieselben sein hofstat nach im besiczet, daz si habent oder gewinnent in der vorgenanten goczhaewsern dacz sant Po^elten und dacz sant Florian gemerchten und zehenten in der Wochaw^e, rechten zehent geben sullen als gewondleich und recht ist. Wir sprechen ouch, das alle scheden chrieg und vordrung die von der egenanten sto^ezz wegen gewesen sind auf paiden tailn geleich gen einander ab sein sullen. Auch sprechen wir, wer den spruch nicht stet hielt daz der vervallen sol sein aller der pen und wandel die die puntbrief sagent die si geneinander gegeben habent. Und des ze urchund so geben wir der vorgenanten pru^ederschafft gemain dacz dem dewtschen haws ze Wienn den prief versigilten mit unsern insigeln. Der prief ist geben ze Wienn nach Christi gepu^erd dreuczehen hundert jar darnach in dem acht und sechczgisten jare des nasten montags vor sand Agnesen tage.

Source Fulltext: OÖUB 8 (Wien 1883) S. 357f., Nr. 365