ICH Hainrich der Freitel von Frichenstorf unnd all mein erbenn verjechen, das die zway güetter genandt das ain auf der Rodtenerdt das annder genanndt zu dem Pumll gelegenn inn Münspeckher pfarr meines vattern des alten herrn Freitleins von Windthag, dem Gott genadt, gewesen sündt unnd seint freis aygen und von niemant zu lechenn, unnd derselb herr Freitel gab die vorgenanten zway güetter seiner dochter Zachrein ledigcleich und rechtlichen zu ainem man Pernharttenn dem Sachsenekker mit allen den nutzen ehren unnd rechten alss er selb in von alter her innen gehabt hatt, und nach demselben Pernhartten des Sachseneckher dott nam die vorgenant fraw Zachary Hannsen den O^eder zu der ehe und vermacht im die vorgenanten zway güetter auch ledigclichen unnd rechtlichen unnd frey. Derselb Hannss der O^eder hatt die vorgenanten zway güeter auf der Rottenerdt unnd datz dem Pu^omel unnd alss dartzue gehört geben unnd gemacht dem erbaren gottshauss dem frauencloster ze Pulgarn den frauen und den herrn daselbs, die haben die obgenanten zway güeter inngehabt unversprochenlich ierer jahr envollen also mit der beschaiden, dass ich obgenanter Hainrich der Freitel und all mein erben furbass gegen dem obgenanten gottshauss umb die zway güetter die vor geschriben sind khain ansprach noch zuespruch noch khain vordrung weder mit recht noch ohnn recht weder vill noch wenig nicht mehr haben noch gewynnen sollen, unnd thuen auch unss der vorgenanten zwayer güetter ledig unnd frey und fürtzicht, mit urkund des brieffs den ich obgenanter Hainrich der Freitel und all mein erben inn geben versigellt mit meinem anhangundten insigll wolbestätt, unnd mit der erbarn leuth Ullrichs des Lawen unnd Petreins des Cellhoffer baider anhangundten innsigl. Der brieff ist geben warn da man zallt von Cristi gebuerdt 1371isten jare des nagsten sonntag vor St. Mörten tag.

Source Fulltext: OÖUB 8 (Wien 1883) S. 556f., Nr. 559